'Drivers License' hitmaker Olivia Rodrigo chuan nimin khan a studio album hmasa ber "Sour' chu a tlangzarh ta a, streaming platform hrang hrangah ngaihthlak theihin a awm tawh a ni.

Disney+ show 'High School Musical: The Musical: The Series' star Olivia Rodrigo album thara hlate hi a mawiin ngaihthlak a nuam hlawm hle a, ram hrang hrang album chart-ah pawh a chet ṭhat a rinawm. Hla 11 dahin a hla genre chu bedroom pop, alternative rock, chamber folk, pop-punk, synth-pop, leh dream pop-te niin an sawifiah.

A album-a hla zingah chuan 'Traitor' leh '1 Step Forward, 3 Steps Back'-te chu stream nei tam chak zual an ni a, heng hlate hi Mizote pawhin kan mawi tih tur chi tak niin a lang.

Rodrigo hian 'Sour' album-a hla pathum 'Drivers License', 'Deja Vu' leh 'Good 4 U' te chu single-in a lo tichhuak tawh a, nimina khan 'Enough For You' live-a a sakna video a tichhuak leh bawk.

Taylor Swift hming a lang
American tleirawl Rodrigo hi Taylor Swift fan ruhkawl a ni tih chu vawi tam tak sawi lanin a awm tawh. Nimina a album thar tihchhuaha track palina '1 Step Forward, 3 Steps Back'-ah chuan writer zingah Taylor Swift leh Jack Antonoff-te hming a lang tel tlat.

Rodrigo leh Swift-te hi vawi khat chiah a takah an la inhmu a, chu pawh kar hmasa lawk khan a ni a, chuti chung chuan a album tharah hian tha a lo thawh ve reng tawh thung a ni.

Mibik Olivia Rodrigo
Ama pualin hla pakhat a tichhuak dek dek a, khawvelin a ngaihven nghal hluai a, mibik a ni tih loh rual a ni lo.

A hla hmasa ber 'Drivers License' chu US Billboard Hot 100 chart-ah kar eng emaw zat chhung topper a ni a, a hla pahnihna 'Deja Vu' chu pariatna a nihpui leh bawk. Hengte avang hian Hot 100 chanchina hla tihchhuah hmasa pahniha top 10 kaipui thei hmasa ber leh awmchhun a la ni bawk.