American singer Stevie Nicks leh Janet Jackson te chu hmeichhe zinga a hmasa ber ni turin Rock and Roll Hall of Fame-ah lakluh an ni ta. Rock and Roll Hall of Fame-ah hian tun hmain hmeichhia lakluh an la ni ngai loa - Stevie Nicks leh Janet Jackson te hian bungthar an rawn kai ta a ni.
Rock and Roll Hall of Fame ceremony hi Brooklyn, New York-ah Zirtawpni zan khan neih a ni a, Stevie Nicks leh Janet Jackson bakah hian - Radiohead, Def Leppard, the Cure, Roxy Music leh The Zombies te chu lakluh an ni bawk.
Hmeichhe tan hmun a awm
Hall of Fame-a lakluh tharte hi rock music huanga mi hlawhtling ber berte an ni a, ngaihhlut pawh an hlawh hle. British rock band lar Def Leppard-te awm ve bawk mah se record siamtu American Janet Jackson leh Stevie Nicks ten ngaihven an hlawh a, lawmpuitu pawh an nghah hle a ni.
Kum 52 mi Janet Jackson chuan, "Rock and Roll Hall of Fame-ah ka hming a chuang ve reng tawh tur hi ka lawm a, chawimawina ropui tak a ni. He huangah hian hmeichhe tan pawh hmun a awm a ni tih lantirtu zinga ka tel hi ka lawm a, mi tam zawkin kan hnung hi rawn zui se tih hi ka duhthusam chu a ni," tiin a sawi.
'Edge of Seventeen' singer Stevie Nicks pawhin ni duhawm bik leh hriatreng tawh tur a nih thu sawiin, Rock and Roll Hall of Fame-a lakluh zingah a tel ta mai chu awih har a tih zawk hial thu a sawi. Stevie Nicks hian Janet Jackson ang bawkin hmeichhia-te tan hmun a awm thu leh, a tam thei ang berin an hnung rawn zui se a duh thu a sawi chhuak ve bawk.
Def Leppard
Tun ṭuma lakluh zingah hian Bristish rock band lar Def Leppard te chu lakluh an ni a, lawmpuitu an ngah hle. Rock music huanga hriat hlawh berte zinga mi an ni a, Rock and Roll Hall of Fame-a lakluh an ni pawh hi a awm hle a ni. Def Leppard rual hian - The Zombies, The Cure, Roxy Music leh Radiohead te pawh lakluh an ni a, an vai hian English rock band vek an ni.
Rock and Roll Hall of Fame induction-ah hian Harry Styles, David Byrne, Trent Reznor, Brian May leh Janelle Monaé te pawh an inlan a, chawimawina hlantuah an ṭang thung a ni.
