Sorkar â tak chauhin defence thuruk a puangzar thin : Chidambaram

Prime Minister Narendra Modi chuan kar kalta Nilaini khan Mission Shakti hnuaiah anti-satellite missile enchhin niin, live satellite kahthlak a nih thu a sawi a, hei hi hlawhtlinna ropui tak, space superpower ram tlemte zinga India dah theitu a nih thu a sawi. 

PM Modi-a thusawi chungchang hi Congress senior leader leh finance minister hlui P Chidambaram chuan chhangin, hetianga defence thuruk puanzar ṭhin chu sorkar â tak chauhin an ti ṭhin a ni, a ti. Chidambaram chuan, " Satellite kap thla thei chu hman aṭangin a awm tawh. Sorkar fing tak chuan a theihna thuruk hi a zep tlat ang. Sorkar â tak chauhin hei hi puangzarin defence thurukte chu a phatsan a ni", a ti. 

Finance minister chuan inthlan campaign laklawh laia BJP sorkarin hetiang a puanchhuahna chhan chu a zawt let bawk a, BJP tana hamṭhatna lak tumnaah a puh. Inthlan neih tur atana model code of conduct hman a nih hnuah PM Modi-an TV-a thu a sawi hi eptu pawl hrang hrangte chuan sawiselin, dan bawhchhiatna niin an sawi. Election Commission chuan PM thusawi chungchang zirchiangtu tur hi a din nghal a, committee hian PM hian test-firing chungchang a sawinaah hian model code of conduct a bawhchhe lo niin a sawi.