Stellar Gospel Music Award sem a ni ta

Gospel music huanga chawimawina ngaihhlut Stellar Gospel Music Award chu Orleans Arena-ah Zirtawpni zan khan sem a ni a, American singer Jonathan McReynolds chu mi mala langsar ber a ni. Jonathan McReynolds hian award paruk zet a humhaw a, chung zingah chuan Artist of the Year pawh a tel a ni. 

Chicago gospel artist McReynolds hian 'Make Room' album a hlawhtlinpui tak zet a, chawimawinain a umzui bawk. Artist of the Year bakah hian 'Not Lucky' chu Song of the Year atan thlan a ni bawk a, Best Contemporary Male Vocalist, Contemporary CD leh Producer of the Year te a tel cheu bawk. 

Jekalyn Carr chuan Female Vocalist of the Year a la a, Best New Artist atan Jabari Johnson thlan a ni. Award ceremony-ah hian 'Queen of Soul' Aretha Franklin sunna hun hman a ni a, Kelly Price, Regina Belle leh Erica Campbell te chu an perform a ni. Gospel legend Delores Washington Green chu Legend Award hlan niin, James Robinson Jr., Jackie Patillo leh Phil Thornton te chu Stellar Honors Hall of Fame-ah lakluh an ni nghal bawk.