CBI-in Chidambaram man

Union finance minister hlui leh Congress senior leader P Chidambaram chu INX media case-ah Nilaini zan dar 10 vel khan Central Bureau of Inves­tigation (CBI) in an man a, New Delhi-ah agency headquarters ground floor-ah zan riahtir a ni. 

Chidambaram hi union finance minister a nih laiin INX media group hnena Foreign Investment Promotion Board (FIPB) clearance pek a nih danah thil dik tawk lo a awm nia puh a ni. FIPB clearance pek vang hian a fapa, Karti Chidambaram chuan hlawkna a tel niin an puh. 

Nimin khan Chidam­baram hi CBI head­quar­ters-ah darkar thum chhung thu zawhfiah zui a ni a, hemi hnu hian court-ah kalpui a ni. Agency chuan court-ah hian ni 5 hren zui an dil. 

Congress hruaitu chuan INX media case chungchanga an puhna chu thu dik lo, BJP kaihhruai sorkarin tihchhiat tuma a beihna niin a puh. Chidambaram-a fapa, Karti pawhin a pa man nih chungchangah, NDA sorkar a sawisel ṭhin avangin ṭawng thei lo tura an siam tumna a ni, a ti. 

Congress lawm lo 

Congress party chuan a chenna in aṭanga P Chidambaram man a nih danah sorkar laipui leh CBI chu na takin an sawisel a, zana a in aṭanga manna tur khawp thilsual tih a nei lo a, union minister hlui hming tihchhiat tumna leh, rorellai BJP phuba lak tumna mai niin an sawi.

Nimin khan Congress party chuan press conference neiin, party leader Randeep Surjewala chuan Chidambaram emaw, a fapa Karti emaw chu INX Media case-ah thil dik lo tia puhna tur finfiahna engmah a awm lo a ni, a ti. Chidambaram chu ama fanu ngei thattua puha man, jail-a tang mek INX Media promoter Indrani Mukerjea thusawi behchhana man a ni, a ti. Agency chuan FIPB permission petu official leh, thil dik lo titua puh company official-te an man loh laiin, kum 40 zet ram tana a hun lo pe tawhtu chu an man lawi si, tiin a sawi. 



Share this Post

Login to comment
No Comments