Srinagar-ah curfew puang leh

Jammu and Kashmir boruak chu a ralmuang tia sorkarin a sawi chungin, nimin khan Srinagar-ah chuan curfew puan nawn leh a ni. 

Sorkar laipuiin Article 370 a tihtawp hnuah Jammu and Kashmir-ah hian curfew puan a ni a, internet leh phone service-te tihtawp a ni bawk. Mahse kar kal ta Zirtawpni kha Muslim-te ṭawngṭai hun a nih avangin khuahkhirhna ṭhenkhat thlahdul a ni a, inbiakpawhna lam erawh hman theih a la ni chuang lo. 

Zirtawpnia ṭawngṭai hun hman zawhah mi eng emaw zat chuan sorkar laipui thiltih dana lungawi lohna lantirin Srinagar-ah kawng an zawh. Nawrh huaihawtte hian zalenna an duh thu leh, Article 370 tihtawp chu an pawm loh thute an aupui. Police-te chuan nawrh huaihawtte hi tear gas leh pellet gun-in an kap a, mi eng emaw zatin hliam an tuar. 

Inrinni pawh khan curfew hi thlahdul a ni a, mipuite chu an mamawh lakkhawmna hun siamsak an ni a, mahse nimin khan curfew hi hman chhunzawm leh nghal a ni.

Eptuten Kashmir-ah all-party team 

tirh phût

Eptu party-te chuan sorkar laipui hnenah Kashmir Reorganisation Act chu la kalpui rih lo turin an ngen a, Article 370 chungchangah state mipuite ngaihdan la tura all-party team tir phawt turin an phût. DMK president MK Stalin hoin eptu party-te hian Chennai-ah meeting an nei a, he hunah hian Congress, Left leh MDMK aiawhte pawh an tel. Meeting-ah hian resolution, 'A new law for Kashmir to be put on hold' tih an siam. J&K chief minister hluite leh political leader hren mekte pawh chhuah turin a phût nghal bawk . 

J&K-ah eptu hruaitute kal phal lo

Communist Party of India (Marxist) hotu Sitaram Yechury leh general secretary  D Raja-te chu Zirtawpni khan J&K-ah kal an tum a, mahse Srinagar airport aṭangin thawn kir leh nghal an ni. D Raja chuan sorkarin J&K boruak a ṭha, a ralmuang tiin sawi reng mah se an lo dan danah state chhung boruak chu a pangngai lo hle tih a lantir a ni, a ti. 

Editors Guild of India-in press mite zalenna pek phût

Editor Guild of India chuan internet leh mobile service tihtawp a, inbiakpawhna lam khuahkhirh chu local media tana thil ṭha lo tak a ni tiin, local media-te chu a hmun awmchilh, thil thleng hre hmasa leh hmu chiangtu an ni, a ti. Article 370 tihtawp a nih hnuah tualchhung chanchinbu tlemte chauh tihchhuah chhunzawm theih a ni a, sorkar pawhin internet tel lo chuan news tihchhuahte chu thil theih loh a ni tih a hrechiang a ni, a ti. Press chu democracy-ah institution pawimawh tak a ni a, hei vang hian zalen taka hna an thawh phalsak chu sorkar laipui chuan a ba a ni, tiin, media communication link siamṭha turin sorkar an phût. 



Share this Post

Login to comment
No Comments