Kathua hmeichhe naupang pawngsual thubuaiah Mi parukin thiam loh an chang

Nikum January thlaa Kathua, Jammu and Kashmir-a hmeichhe naupang pawngsual thubuai kal zelah Thawhṭanni khan Pathankot special court chuan mi paruk thiam loh chantir an nih thu a puang.

Kathua hmeichhe naupang pawngsual thubuaiah hian mi pasarih man an ni a, pakhat hi chuan thiam a chang a, midang parukte erawh hi chu thiam lo chantir an ni thung. Thiam loh chang zingah hian sorkar official retired pakhat pawh a tel.

Thiam loh chang zinga pathum hi pawngsual rawn leh tualthah thubuai siamsak an ni a, midang pathumte erawh hi chuan pawngsualtute thiltih finfiahna tur tihchhiat thubuaiah thiam loh an chang thung. Heng zingah hian police pahnih an tel a, police pahnih leh midang pakhatte hi hmeichhe naupang thah a nih dan chhuitute an ni a, finfiahna tihchhiat an tum avangin thiam loh chantir an ni ta a ni. 

Revenue department official retired Sanji Ram chu a bultumtu berah puh a ni a, police-te chuan Ram hian Bakarwal community-te chu a chenna khua Rasana thingtlang khua aṭanga chhuahtir a duh avangin a unau fa chu hmeichhe naupang rubo tur hian a ti ta tih an sawi. Ram-a fapa Vishal chu man zingah hian tel mah se thiam loh chan tir a ni ve lo thung.

June 3 khan pawngsual thubuai hi ngaihtuah zawh a ni a, mahse nimin khan thutlukna hi puanzar a ni chauh a, tualthah leh pawngsual thubuai siamsakte hi damchhung tang tur hrem an ni a, midang pathumte hi chu kum nga tang tura hrem an ni thung. 

Thu hretu 114 zet hnen aṭanga thil thlen dan ngaihthlak a nih hnuah thu­tlukna hi siam a nih thu tarlan a ni. 

Ram pum nghawng pawngsual thubuai chu

January 10, 2018 khan J&K-a Kathua hmeichhe naupang, kum 8 mi chu a bo a, ni li liam hnu January 14-ah ramhnuaiah a ruang hi chhar a ni. Hmeichhe naupang ruang hi an enfiah hnuah rehhlum a ni tih hriat a ni a, lunga delh a ni bawk.

He pawngsual leh tualthah thubuai hi hmeichhe naupang chhungte ngenna angin Supreme Court chuan Punjab-a Pathankot-a ngaihtuah turin a transfer a ni. Naupang chhungte hian Jammu and Kashmir-ah ngaihtuah a nih chuan an ṭhiante leh an chhungkaw nunna chu derthawnga a awm an hlau a ni.

Hetihlai hian Jammu and Kashmir Crime Branch chuan pawikhawihtu nia rinhlelhte chu manna tur thupek a tichhuak nghal a, mahse pawikhawitu nia puhte hi BJP lawmaker-te leh right-wing Hindu Ekta Manch-te chuan an thlawp a ni.

State BJP Minister pahnih thusawina video, pawikhawihtu nia puhte an thlawpna thu an sawina phei chu a darh nasa hle a, hei hian sawisel a hlawh nasa hle. BJP leh an thawhpui Mehbooba Mufti kaihhruai Peoples Democratic Party inkar phei chu a chhe hman hle bawk.

State pakhata pawngsualna thlen chungchangah hian Prime Minister Narendra Modi meuh pawh a inrawlh a ngai a, PM chuan pawikhawihtu chu hrem ngei a tiam a ni.

BJP Minister pahnih-  Industries Minister Chandra Prakash Ganga leh Forest Minister Lal Singh-te chu bang tura tih an ni hial bawk.




Share this Post

Login to comment
No Comments