Customer-te'n transaction fee an pek a ngai dawn lo

Bank-te'n card payment hmanga petrol pump-a fuel lei a nihin, petrol pump neitute transaction fee chawitir an tum avangin pump neitute an lungawi lo a, hei vang hian January 13 aṭangin petrol pump-ah credit leh debit card payment an dawn theih tawh loh tur thu an sawi. 

Sorkar laipui chuan bank leh petrol pump neitute inkara harsatna awm chu chinfel dan kawng a zawng mek tih a sawi a, hemi rual hian customer-te chungah phurrit siam a ni dawn lo a, transaction fee an pek a ngai dawn lo tih, Oil Minister Dharmendra Pradhan chuan a sawi. 

Bank-te'n petrol pump neitute hnena transaction fee, 0.25% - 1% chawitir an tum chungchanga sorkar laipui a inrawlh hnuin fee chawitir an tum hun hi sawnhlat a ni. 

Ramchhungah hian petrol pump 56,200 vel a awm a, heng zinga ṭhenkhat chu private company, Reliance leh Essar-te pump a ni. 

Private bank-te chuan transaction fee hi sorkar hnuaia oil company-te pek tir an duh tih an sawi a, hemi chungchang hi sorkarah pawh an lo thlen tawh thu an sawi. Mahse sorkar enkawl company-te chuan fuel leina atana card payment hmangtute hnenah 0.75% an  pek let leh zel thu an sawi thung.

Sorkar laipuiin nikum November 8-a pawisa note a tih thih hma khan petrol pump-a debit leh credit card hmanga fuel leitute chuan transaction fee an chawi ziah ṭhin. Mahse pawisa tih thih a nih hnuah sorkar laipui chuan cashless payment chawilar a tumna peng pakhat atan customer-te chu transaction fee a awltir a, hei hi bank-te'n an tuar thung a ni.


Share this Post

Login to comment
No Comments