India ramah Covid-19 kai 5,48,318 an awm tawh

India ramah hripui kai an pun belh zel a, nimin thleng khan mi 5,48,318 laiin an kai tawh. 

Ministry of Health and Family Welfare report tihchhuah tharah chuan hri kai thar 19,459 an awm a, darkar 24 chhungin mi 12,010 lai enkawl dam bawkin mi 380-in an thihpui leh a ni. Pathiannia Covid-19 vanga thi zingah hian New Delhi-a  Lok Nayak Jai Prakash (LNJP) Hospital-a senior consultant anaesthetics, Dr Asheem Gupta a tel. Dr Gupta hian a duty-na aṭangin hri hi a kai a ni. India rama hripui vanga thi zingah doctor 300 chuang an tel tawh a ni. 

Nimin thleng khan hri kai enkawl dam tawh 3,21,723 an awm a, kai mek 2,10,120 la awmin mi 16,475 in an thihpui tawh bawk. Enkawl dam tawh rate hi 58.67% a ni a,  dam zat pawh hi an pung chak hle tho.

Indian Council of Medical Research (ICMR) chuan ni khatah Covid-19 sample 1,70,560 an test tih sawiin hri len ṭantirh aṭanga nimin thleng khan sample 83,98,362 an test tawh. Sample test theihna laboratory pawh pawh 1047 nei tawhin heng zinga 760 hi sorkar laboratory a nih laiin 287 chu private laboratory a ni thung. 

India rama Covid-19-in a nghawng nat ber state Maharashtra-ah chuan mi 1,64,626 in an kai tawh a, kai hmuh chhuah thar 5,493 awm lehin mi 7,429-in an thihpui tawh. Hri kai zingah hian 86,575 chu dam tawhin 70,622-in an la kai mek a ni.

Delhi-ah pawh hri kai hmuh chhuah thar 2,889 an awm belh leh a, hri kai 83,077 an awm tawh. Heng zinga 52,607 chu an dam tawh a, 27,847 chuan an la kai mek. Mi 2,623-in an thihpui tawh thung. Delhi-ah hian containment zone 421 a awm tawh a ni. 

Tamil Nadu-ah chuan hri kai 82,275 an awm tawh a, heng zinga 35,659 hian an la kai laiin 45,537 chu an dam tawh. Mi 1,079 chuan an thihpui tawh bawk a ni.

State ṭhenkhatin lockdown pawtsei

Hripui leng vanga sorkar laipuiin lockdown a puan chu June 30 hian a tawp dawn a, hetihlai hian state eng emaw zat chuan hri lengin ziaawm lam a la pan loh avangin lockdown pawhsei an tum. 

Maharashtra chuan June 30 hnu lamah lockdown hi pawhsei chhunzawm zel a ni dawn tih a sawi a, mahse khuahkhirhna tam zawk erawh thlahdul a tum. 

Rajasthan chuan July 1 aṭangin rural area bikah sakhaw biakna hmunte  hawn ṭan phal dawn mah se, ṭum khata kal thei zat hi a bithliah dawn a ni. 

Manipur sorkar chuan July 1-15 thleng lockdown a pawtsei dawn tih a puang tawh a, mahse inter-district bus erawh service phalsak an ni ang. 

Tamil Nadu pawhin medical field lama mithiamte rawnin, lockdown pawhsei chungchang a ngaihtuah mek. 

Telangana chuan Greater Hyde­rabad Municipal Corporation (GHMC) bikah ni 15 dang lockdown kalpui chhunzawm a tum. 

Uttarakhand khawpui, Dehradun-ah chuan Pathianni bikah lockdown hi kalpui chhunzawm zel a ni ang. 

Puducherry chuan inkharkhipna hi July 2 thleng kalpui a nih tur thu a puang. 

Karnataka sorkar chuan July 5 aṭangin Pathianni apiangin total lockdown kalpui a tum a, zan dar 8 aṭanga a tuk zing dar 5 thleng curfew puan a ni bawk ang. 

Jharkhand-in July 31 thleng lockdown a pawtsei a, zirna inte pawh khar chhunzawm vek an la ni ang. 

Assam sorkar chuan Guwahati khawpui bikah nimin aṭangin kar hnih chhung total lockdown a puang a, district tinah zan lamah curfew puan a ni bawk. 



Share this Post

Login to comment
No Comments