India sipaiten Pakistan hel ralthuam tihchhiat sak

India sipaite chuan Thawhṭanni khan Pakistan occupied Kashmir (PoK)-a Pakistan army post hnaiha Leepa ruamah helho ralthuam an tihchhiat sak.

Pakistan army-te chuan hemi hmun aṭang hian helho puih pahin ramri bula India khaw ṭhenkhatte an bei ṭhin nia sawi a ni. J&K-a PoK hmun ṭhenkhatah hian Pakistan chuan helho training camp a buatsaih mai bakah, a puih ṭhin thu tarlan a ni bawk. 

Helho hi pawl hrang hrang a mi an nih thu sawiin, hel pawl lian tak Jaish-e-Mohammad, Hizbul Mujahideen leh Lashkar-e-Taiba-te chu August thla khan, Pakistan sipaite puihnain PoK-ah hian training camp an rawn neih thu Intelligence-te chuan an sawi.

Heng helhote hi Line of Control (LoC) kaltlanga Jammu and Kashmir-a thiam taka lut ru tura zirtir nia sawi a ni a, J&K-a sakhuana hmun serh leh security force station bei tura chher hriam an nih thu sawi a ni bawk. 

Jammu and Kashmir-a hel an luh belh zel theihnan Pakistan Army leh Inter-Services Intelligence (ISI)-te ṭangkawp chuan helho tan camp pathum an siam belh thu Intelligence lam chuan an sawi.

PoK-ah hian helho camp 18 a awm mek thu India agency-te chuan an sawi. Pakistan Army leh ISI-te thlawpnain, heng zinga camp tam zawk chu LoC rawn kaltlang tura an inpeih tawh thu sawi a ni bawk. Camp lar zual chu Manshera, Kotli leh A-3 hmunah a awm a, Manshera khua Balakot, Garhi, Habibullah, Batrasi, Chero Mandi, Shiwai Nala, Muskara, leh Abdullah bin Masood hmunahte ralthuam hlauhawm tak tak dah a ni.



Share this Post

Login to comment
No Comments