India-in China-Pakistan Thuchhuah a pawm lo

Ministry of External Affairs (MEA) chuan Jammu and Kashmir chungchanga Pakistan leh China-in thuchhuah in-

ṭawm an siam chu a pawm lo tih a sawi. 

China Foreign Minis­ter-in tunhnaia Pakistan ram a tlawh hnuah ram pahnihte hian J&K chungchangah thuchhuah siamin, China chuan Pakistan a thlawp thu a sawi a ni. An thuchhuah hi chhangin, MEA thupuangtu Raveesh Kumar chuan J&K chu India ramchhung a ni a, hemi chungchanga Pakistan leh China-in thuchhuah an lo siam chu an pawm lo tih a sawia, hetiang thil ti lo tur hian ramdangte pawh a ngen nghal tih a sawi bawk. 

Pakistan leh China-in thu­chhuah an siamah hian, Kashmir buaina chungchangah China chuan Pakistan a thlawp tlat tih tarlangin, boruak ṭha lo siam tura thiltih reng reng chu an dodal tih an sawi a ni. He thuchhuah hi Pathianni khan an tichhuak a ni. 

China Foreign minister Wang Yi hi kar liamta khan Pakistan-ah zinin, Pakistan ram hruaitute nen Kashmir chungchang hi an sawi a ni. Wang chuan J&K dinhmun chu a ngaihven reng tih sawiin, hun rei tak aṭanga Kashmir chungchanga vanga Pakistan leh India-in buaina an neih tawh chu UN Charter behchhanin, boruak ṭha leh muanawm tak hnuaiah chinfel a ngai a ni, a ti. 



Share this Post

Login to comment
No Comments