Passenger data ruk vangin British Air-ways sum chawi tir

British Airways chu nikuma computer hacker-ten an passenger sang telte data, an bank details-te an ruksak avangin  pound maktaduai 183.39 chawi tura tih a nih thu a parent group, International Airlines Group ( IAG) chuan a sawi. 

IAG chuan hemi chung­changah hian thuchhuah siamin, UK Information Commi­ssioner Office chuan UK Data Protection Act hnuaiah airline hi sum chawi tura a tih thu a tarlang. Sum an chawitir hi kum 2017 chhunga British Airways turnover aṭanga 1.5% a tling pha tih a sawi bawk. 

IAG chief executive Willie Walsh chuan sum chawi tir chungchangah appeal dan an zawng dawn tih a sawi a, BA CEO Alex Cruz pawhin hetiang hremna pek an ni hian a ṭhawngin an lawm lo hle  tih a sawi. Cruz chuan British Airways chuan customer-te data ruksak an ni tih a hriat veleh hian rang takin hma pawh a la nghal tih a sawi bawk. 

BA hian nikum Sep­tember thla khan  hack an nih thu a sawi a, passenger-te data ruksak zingah hian an hming, postal address, email address leh credit card information-te a tel a ni. 

IAG hian Birtish Air­ways bakah Aer Lingus, Iberia, Level leh Vueling te nei a, mahse airlines dang chu an hack hian a tibuai ve lo thung. 



Share this Post

Login to comment
No Comments