Lebanon minister pali bang

Lebanon sorkar laka lungawi lohna lantira ni thum chhung nawrh huaihawt a nih hnuah, prime minister Saad Hariri-a thawhpui, a cabi­net palite (Lebanese forces party) chu an bang.

Lebanese forces party-te hi Lebanese Christian party base an ni a, ṭangrual sorkar aṭangin an inhnukdawk nghal bawk a ni. 

Sorkarin chhiah lak a tihsan avang leh eiruk duh lohna lantirin Lebanon khawpui Tripoli, Beirut leh khawpui dangahte nawrh hi an huaihawt.

Lebanese forces party president Samir Geagea chuan,"Sorkar aṭangin kan party chu kan inhnuk dawk ta a ni. Kan ram dinhmun harsatna sukiang tura kan sorkarin hma a lak thiam loh avangin, kan minister-te chu bang turin kan ti ta a ni," a ti. 

Nawrh huaihawtte hian an ram politics kal­dan phung chu nasa takin an sawisel a, an rama hma­sawnna ruhrel chhe lutuk vang te, eirukna hluar vang te, sorkar funding hman khaw loh avang leh unemployment rate sang vangtein sorkar lakah hian lungawi lohna an lantir a ni.



Share this Post

Login to comment
No Comments