US-in blacklist-ah Chinese Company 28 telh

China-a Xinjiang biala Turkic ethnic minority group "Uighur" leh Muslim minority-te chunga China chetdanah US a lungawi loh avangin Chinese Company 28-te a blacklist-a an telh thu US Commerce Department chuan a puang.

US Secretary of Commerce Wilbur Ross chuan heng blacklist-a an telhte hian US bungrua leh thilsiam chu an lei theih tawh dawn loh thu sawiin, China-in minority-te nasa taka a rapbet hi US chuan a ngai thei lo a ni, a ti bawk. 

US Federal Register chuan heng blacklist an tihchhuah zingah hian, video surveillance company Hik­vision, artificial intelligence com­pany Megvii Technology leh SenseTime-te pawh an tel thu a tarlang.

Rights group-te chuan China hian Uighur mi maktaduai khat bawrvel leh Muslim minority-te hi Xinjiang thlang lama re-education camp-a a khung hran thu tarlangin, China hian helai hmuna awmte dikna chanvo chu a palzut sak thu an sawi.

China hian an ram Xinjiang biala Turkic ethnic minority group leh Muslim minority-te camp-a khunghrana puhna hi a pha a, mahse "vocational training school"-a an awm thu erawh a sawi thung. 

Vocational training school-a dah an nih chhan hi terrorist venthawn thilah a nih thu a tarlang bawk. 

Washington chuan Xinjiang biala khung hrante laka China chetdan chuan, Germany-a Nazi ho chetdan a hriatchhuah tir thu a tarlang. 



Share this Post

Login to comment
No Comments