Sorkar building sakna turin Rohingya khua tichhia

Myanmar-a Rohingya Muslim-te chenna ṭhin thingtlang khaw eng emaw zat chu tichhiain, heng hmunah hian sorkar chuan police barrack, sorkar building leh refugee relocation camp-te a siam zawk tih BBC chuan a tarlang. 

BBC team hian kum 2017-a Myan­mar sipaiten Rohingya Muslim-te laka beihpui an thlak avanga Rakhine state-a Rohingya-ten an tlanchhiatsan an khaw hluite hi an fang a ni. Sipaite beihpui thlak vang hian Rohingya mi nuai sarih chuang zet chu Bangladesh ramah an tlanchhia a, tun thlengin refugee camp hrang hrangah an la khawsa a ni. 

Bangladesh leh Myanmar sorkar chuan raltlante hruai kir tur hian inremna siam tawh mah se, raltlan zingah Myanmar ramah kir duh an la awm lo. 

BBC team hi Rakhine state-a hruai an ni a, mahse police-te enpuina tel lo chuan tualchhung mipuite an kawm leh thla an lak phalsak an ni lo thung. 

Australian Strategic Policy Institute chuan satellite image a zirchianna aṭangin, kum 2017-a sipaite beihpui thlakna, Rohingya chenna thingtlang khaw zinga 40% chu tihchhiat a ni tawh tih a sawi. Hei vang hian Bangladesh camp-a la awm mek, raltlan tam tak hi hruai kir ni mah se, an khaw ngaia kir lehna nei lo tur eng emaw zat an awm dawn a ni. 



Share this Post

Login to comment
No Comments