Israel PM-in a ruka nuclear siamna hmun neiah Iran puh

Israel prime minister Benja­min Netanyahu chuan Iran chu a ruka nuclear ralthuam siamna hmun neihah a puh a, mahse Israel-in a hriatchhuah hnuah he hmun hi Iran chuan a tichhia tih a sawi. Iran chuan hei hi thu dik lo niin a sawi ve thung. 

PM Netanyahu chuan Thawh­ṭanni khan Jerusalem-ah news conference neiin hemi chung­chang hi a sawi chhuak a, Iran nuclear siamna hmun nia sawi satellite thlalak pawh a tilang bawk. He thlalak hi kumin June thlaa lak a ni tih a sawi a, mahse a hnu thla khat velah he hmuna building-te chu tihchhiat an ni, tiin a sawi.

Netanyahu chuan Israel spy-ten Iran nuclear programme chungchanga thil pawimawhte an rukchhuah hnuah, Abadeh khuaa nuclear ralthuam siamna hmun a awm thu hi kum 2018 kumtir lam khan an hre tawh tih a sawi. Mahse an hmun thuhruk hi Israel-in a hrechhuak tih an hriat avangin Iran chuan a tichhe ta a ni, a ti. Iran vauna thu chhakchhuak nghalin, "Israel chuan engnge intih a hriat a, eng hunah nge intih hriain, khawi hmunah nge intih pawh a hre zel a ni," a ti. An thil tih dik loh thup an tum chu an hmuhchhuah sak zel a, hemi hnuah an tihsual thup tumin ṭan an la leh ṭhin niin Iran chu a puh. 

Israel Prime Minister chuan Iran-in nuclear ralthuam a siam tur hrekna kawngah US chu thawhpui turin ramdangte a ngen zui nghal bawk. 



Share this Post

Login to comment
No Comments