Mesut Ozil-a'n Arsenal tan a contract titawpin Fenerbahce a zawm fel. Germany international hlui hian Gunners player ni tawh lo mah se a dam chhungin North London club zinga mi a nih ve tawh tur thu a sawi chhuak.
Kum 32 mi Ozil hian North London club tan June thla thleng contract a nei a, kar khatah £350,000 (Rs 3,49,83,928) a hlawh. Mahse, atan Emirates Stadium-ah hmun a awm tawh lo a, club nen inremsiam tawnnain a contract hi an titawp.
FA Cup vawi thum champion hian kum thum leh a chanve atan Turkish club a zawm. Fenerbahce hi Turkish Super Lig-ah pathumna ni mekin league nomawi an la beisei ngam - Ozil an neih hnuah beisei an nei sang zual ang.
An thlah
A chhan chiang taka sawi si loin Premier League squad aṭangin an paih a, inkhel turin an duh ve tawh lo. A hun hnuhnungah erawh Arsenal chuan an player kal chhuak ta hi ṭha takin an thlah.
Gunners technical director Edu chuan, "Mesut puitlinzia kan hria, a hnathawh ropui tak avangin a chungah kan lawm takzet. Arsenal chhungkua chuan, a kal zelna turah hriselna nei se, hlawhtlinna chang zel bawk turin duhsakna kan hlan," tiin a thlah.
Arsenal manager Mikel Arteta pawhin Ozil hnathawh chu sawi nep theih loh, chhuanawm leh hriatreng tawh tur a nih thu a sawi ve bawk. Arteta hnuaiah hian Ozil-a'n inkhel vawi 10-ah bul a ṭan a, a hnu lamah erawh a chhawr zui ta lo.
Number 67
Ozil hian January 24, Pathianni aṭang khan a club thar tan training a zawm tawh. A jersey number hak tur an inrinsiak a, Turkey rama a chhenna khua Zonguldak postal code '67' a ha dawn nia sawi a ni - number 11 chu thlan theihin a awm bawk.
Fenerbahce tan Ozil neih hi thil ropui a tling. London aṭanga Istanbul a panna thlawhtheihna thlawh dawn khan Fenerbahce fans 300,000 chuang zetin internet kaltlangin an lo ngaihven (track) hial. A club tharah hian kar khatah £67,300 (Rs 67,28,711) a hlawh dawn nia sawi a ni.
Arsenal aṭanga a hlawh lak nen chuan a inthlau dawn hle. Mahse pound maktaduai 460 vel leiba nei nia sawi Fenerbahce tan chuan phurrit a ni phak dawn. Turkish club president Ali Koc chuan fans hnenah tlem lua awm loin Ozil-a hlawh tur thawhkhawm turin a ngen hial.
#TheAssist
London khawpuiah hian kum sarih leh a chanve, ni 3000 dawn chu a ni ka awm tak ni, chumi hnuah hetiang thu ziah a ngai mai hi hriatthiam pawh a har. He khawpui ka thlen tirh aṭang khan ka ṭhian, Arsenal staff leh fans chuan duhsakna kutin min lo kuangkuah a nih kha.
2013 September thla khan a ni a, ka chunga Arsene Wenger-a'n rinna a nghah kha a ropui ka ti hle. Rawlthar mai ni kha North London-ah hian ka puitling chho a, ka tan chuan London hi a tir aṭang khan 'in' a ni, engtik lai pawha theihnghilh loh tur leh ka 'in' tia ka sawi ve tawh tur chu a ni.
Arsenal nen hun rei tak chhung kan inchenchilh chhung khan hun harsa leh hlimawm tak tak ka tawng. Match 250 chuang ka khelh aṭangin goal 44 ka khung, ṭhiante khung tur vawi 71 ka siamsak bawk - tunah chuan Arsenal nen kan inṭhen a lo hun ve ta.
#TheAssist
Kan thawhhona ṭha vangin season kua zet nomawi chawi loa kal tawh chu kan titawp a, hun rei tak hnuah fans lamin a phu ang ngeiin nomawi kan hlawh chhuak a nih kha maw.
Arsenal nena kan inlaichinna zawng zawng ziah chhuah hi thil awlsam a ni lo. Engtin nge kum riat chhung hun hman kha ka ziahchhuah theih tehlul ang ni? Gunners jersey ka ha tawh lo a ni mai thei, chuti chung pawh chuan match an khelh tur zawng zawngah ka thlawp zel ang.
Dam chhungin Gunner ka ni tawh dawn - rinhlelh tur a awm lo. Tun hma zawng aiin an hnungah ka thlawp lehzual ang. Tun season Premier League hi a harsa lehzual a, chuvang chuan squad leh hnathawktute kan thawp ṭhat a ngai lehzual.
#TheAssist
Hale End aṭanga naupang rawn inzir chhuak hmuhte hi a nuam ka ti ṭhin. Arsenal senior team tana an rawn khel phakte hi ka lawmpui. Kan hriat vek angin anni hi kan club hmathlirte an ni a, hlawhtlinna chang turin duhsakna ka hlan!
Emirates Stadium chhunga inkhel entuten duhsak taka ka hming an lam ri te kha ka tan chuan theihnghilh theih a ni tawh dawn lo a, lungchim taka jersey ka lo hak tawhna hi ka tan chuan a hlutna a nep thei tawh ngai dawn lo a ni.
Arsenal hi club ropui a ni a, a chang chuan player leh hnathawktu hrang hrang chu an rawn kalin an liam leh ṭhin ang, thil kalphung pawh a ni. Mahse, club hlutna leh fan-te erawh chatuana awm tawh tur an ni thung.
#TheAssist
Arsenal nihna, inzahtawnna leh a ropuina te hi engtikah mah theihnghilh loh tur a ni a, Mitin tan club zahawmna leh ropuina vawnhim zel hi kan tih tur leh mawhphurhna a ni tel nghal bawk.
Sawi tawh ang khan, tun hnai ka hun hman liam kha a harsa ve hle. Player dangte ang bawkin team tan khelmual chhungah a tam thei ang ber inlan ka duh. Amaherawhchu, a chang hi chuan hringnunah hian kan duh leh beisei ang vekin thil a thleng thei bik si lo.
Mahse, harsatna karah pawh a ṭha lam en thiam a pawimawh, chumi chu ka tum pawh a ni. Arsenal tana khelh kha football chauh a ni lo a, chhungkua a ni. Ṭhiante goal khung tur siamsak ka tum ang bawkin London tana thil ṭha tih ka tum ṭhin.
#TheAssist
North London hian a nihna angin min lo dawngsawng a, hlimna leh lawmna tam tak pawh min lo thlen. Tunah ka chhuahsan a ni mai thei, mahse North London ngaih erawh banni reng ka nei lo'ng nge.
Tunah hian lehkhabu chu ziak zawm lo tura khup a lo ni ta. Mahse he club ropui tak nena kan inzawmna chu engtikah mah a thamral ve tawh lo ang. Tun atan chuan mangṭha tih a ngai, mahse kumtluang atan erawh a la ni lo ang.
Khawvel puma Arsenal fans tan: YaGunnersYa
Mesut
