Zaninah Lampard-a tel lohna Chelsea

Chelsea-in Frank Lampard-a tel loa nun an inzir chho ṭan dawn a, zanin dar 11:30-ah Wolverhampton Wanderers an mikhual ang. Blues hian FA Cup-ah Luton Town an hneh a, Premier League-ah erawh match hnuhnung pariatah vawi hnih chauh chakin vawi nga an chak lo.

Blues manager hlui Jose Mourinho chuan, "Hnathawhpuiten hna an chan hian a hrehawm ṭhin. Frank hi hnathawhpui satliah a ni lo a, ka career-a mi pawimawh tak a ni a, a chunga thleng hi pawi ka ti takzet. Football nun rawnna a tawng baw ve ta a ni," tiin a player enkawl ṭhin Lampard-a chungchang a sawi.

Lampard hi Chelsea legend a ni a, London club tan goal 211 khungin club record goal scorer a ni a, nomawi lian tham 11 a chawipui. Amaherawhchu Roman Abramovich-a'n club legend chungah zahngaihna a lantir lo a, manager ang thoin Lampard pawh ban a ni.

London-a Chelsea ṭantu ṭhahnem tak chuan Lampard hi hun an pe rei loah an ngai a, tunah erawh thutlukna a siam a ni tawh. Wolverhampton Wanderers nen an inkhelh hunah Thomas Tuchel-a'n a ho hman ang em tih chu zawhna a ni tawh zawk.

German manager Tuchel hian Christian Pulisic chu Borussia Dortmund-ah a enkawl tawh a, PSG-ah Thiago Silva a enkawl tawh bawk. French champion a enkawl lai hian club thuneitute hnenah Jorginho leh Antonio Rudiger laksak turin a ngen tawh bawk.

Chelsea hian match 19 khelh zawhah point 29 hmuin pakuanaah an awm mek a, PSG aṭanga ban hlim Tuchel-a hmabak a harsa dawn. France ramah chuan PSG-in elpui lian tham an nei meuh lo a, England-ah chuan Pep Guardiola-a Manchester City, Jurgen Klopp-a Liverpool, Jose Mourinho-a Tottenham, Carlo Ancelotti-a Everton, Ole Gunnar Solskjaer-a Manchester United leh Brendan Rodgers-a Leicester City a ni nawk a, hmabak a harsa dawn.

Stamford Bridge-a lenglut tur Wolves record a ṭha bik lo, Nuno Espírito Santo hote hian league match hnuhnung parukah chak an nei lo a, match hnuhnung pakuaah vawi khat chauh chakin vawi ruk lai an chak lo.