Chennaiyin-in Mumbai City an chelh

Team talbuai Chennaiyin City chuan awlsam taka hneh chi an ni bik lo tih pholangin club ṭha Mumbai City lakah an theihna an pho chhuak a, 1-0 a an hnufual reng hnuah si phurh sut zoin 1-1 in an inhnehtawk. 

Mumbai tan ISL striker langsar Bartholomew Ogbeche chuan minute 21-na lekah goal hmahruai a khung a, Mumbai club hian Paris Saint-Germain striker hlui goal khung hi an chakpui mai dawn niin a lang hman. 

Mahse, minute 70 pelh hnuah Chennai club-in penalty an hlawh chhuak a, striker Jakub Sylvestr laka a foul avangin Mumbai City midfielder Ahmed Jahouh chuan penalty a chawi. 

South Indian club tan penalty spot lam panin Esmael Goncalves-a lo pen chhuak a, Ligue 1 club Nice striker hlui hian minute 76-naah goal-ah a chantir - hun tawp thlengin team pahnihin goal an khung tawh lo a, 1-1 in an ṭin.

Chennaiyin tan Lallianzuala Chhangte leh Jerry Lalrinzuala ten inkhel bul an ṭan ve ve a, Lunglei tlangval Lianzuala hian goal khungna remchang nei mah se Mumbai goalkeeper Amrinder Singh chuan ṭha zetin a dansak.

Amrinder Singh hian Esmael-a goal khung tur nia lang chu ṭha zetin a dansak bawk a, kum 27 mi goalkeeper hian ISL goalkeeper zinga hlawh hnem pawl a nih chhan pholan nan a hmang. 

Mumbai hian league match 12 chhung chu tlawm nei loin a zawnin hun an hmang tawh a, league match hmasa bera NorthEast United an ngam lo tih loh kha chu tlawm an nei leh tawh lo - match kua an chak a, vawi thum chu an khingpui an inhnehtawkpui. 

Sergio Lobera hnathawh zarah FC Goa chuan season hmasa khan table chung ber luah chungin league round an khar a, tun season-ah pawh Spanish coach kaihhruaina hnuaiah Mumbai dinhmun a ṭha hle - league round-ah pakhatna an nih chuan season tharah AFC Champions League an khel thei dawn a, hei hi player leh coaching staff-ten an thlirlawk ang. 

Hetihlai hian Chennaiyin tan erawh league hmahruaitu nichunga season khar chu tum tawh loh mai a finthlak berin a rinawm a, chutihrual chuan playoff khel thei dinhmunah erawh an ding reng thung - chetsual zui loh chu South Indian club tan a pawimawh dawn.