Liverpool hmachhawn turin Spurs an inpuahchah

FA Cup fourth round-ah Tottenham Hotspur chuan 4-1 ngawtin Wycombe Wanderers an sawp a, Ningani zan Premier League match-a an mikhual tur Liverpool tan inkhel hmuhnawm a nih ring suh.

Wycombe tan Fred Onyedinma chuan rin loh takin goal hmahruai a rawn khung a, mahse, London club chhaih kawlhna goal chauh a ni - goal liin Spurs hian an chhanglet. 

Spurs fan-te lawmna turin Gareth Bale chuan si phurh sutna goal-a khung a, Tanguy Ndombele chuan goal hnih khungin Harry Winks chuan goal khat a khung bawk. 

London club-in Liverpool hmachhawn zui dawn mah se Jose Mourinho-a'n a player pawimawh Ndombele, Son Heung-Min leh Harry Kane-te bench aṭangin a luhtir a, champion a duhzia a pholang - fifth round-ah Everton an hmachhawn ang. 

Championship mawngphah luahtu Wycombe hian tun season-a league match 23 an khelh aṭangin vawi thum chiah hnehna an la chang a, Spurs hi awlsam taka FA Cup fourth round paltlang tura ngaih an ni. 

Mahse, beisei ang ngawt erawhin thil a kal lo - minute 25-naah Championship club hian Spurs an barakhaih a, Fred Onyedinma chuan goal hmahruai a khung. 

Spurs player an hawihai a, fan-ten an rin loh lam aṭangin goal an hmu. Mahse, London club-in team tenau zawk laka tlawm an duh lo a, Gareth Bale chuan first half hun pek belhah si phurh a rawn sut. 

Goal dang lut loin chawlhlawk hman a ni a, first half-ah Spurs an chungnun bik loh avangin coach Jose Mourinho-a tan lawmna tur a vang rih hle. 

Mourinho-a'n nomawi chawi a duh a, goal an khung loh reng bawk si avangin player ṭha a khek thei lo. Minute 58-naah Kane-a luhtir a, minute 68-naah Ndombele leh Son Heung-Min a luhtir bawk. 

Hun tawp nan minute li chauh a awm tawh tihah Spurs ṭantute hlauthawng beng dai turin Winks chuan goal a rawn khung ta nge nge a, minute khat pawh a liam hmain Ndombele chuan a rawn chhunzawm. 

French midfielder goal khung hi amah ang thoa bench aṭanga luhtir Son-a siamsak a ni a, hun pek belh minute thumnaah Ndombele hian a goal hnihna leh chak nemnghehna a khung zui. 

Kum 24 mi Ndombele-a goal hnihna pawh hi bench aṭanga luhtir tho Pierre-Emile Hojbjerg siamsak a ni a, Mourinho-a'n chak a duhna kawngah thutlukna a siamsual lo tih a lang - Ndombele hian Spurs tana inelna hrang hranga match a khelh hnuhnung parukah goal li a khung tawh. 

Game hautakin hmuak mah se Mourinho-a'n player ṭha khek a tum lo a, Portuguese coach chuan Spurs tana champion nomawi chawi ngei a duh vang a nih thu a sawi. 

Mourinho chuan, "Kar khata match li khelh tur kan neih lai khan  Europa League emaw Carabao Cup chu kan enliam mai ringtu an tam a, mahse, chutiang chuan kan ti lo. 

"Vawiinah pawh squad pumpui kan hruai a, Hugo Lloris chu in lama awm awmchhun a ni. Theihtawp chhuah zel a, kal zel kan duh. February-ah pawh Premier League, Europa League leh FA Cup khelh a ngai leh dawn a, inelna pathum kan hmachhawn dawn. 

"A harsa dawn tih chu kan hria a, mahse, theihtawp chhuah zel kan duh a ni," a ti - Spurs hian February chhungin Brighton & Hove Albion, Chelsea, West Brom, Everton (FA Cup), Manchester City, Wolfsberg (Europa League), West Ham leh Burnley an hmachhawn dawn a, a awlsam lo ang.