Season ngaihnawm tak a ni dawn - Pirlo

Juventus manager Andrea Pirlo chuan season kal laia chona an hmachhawn chu nuam a tih thu a sawi a, eng inelna pawh ni se nomawi inchuha inel chhoh vel chu nuam a tih thu a sawi chhuak.

Season hmasa khan Old Lady hian Maurizio Sarri kaihhruaina hnuaiah Serie A nomawi an chawi a, an duh ber Champions League-ah erawh an hawhtling lo. Coppa Italia-ah pawh Napoli ngam loin beisei an phak lo bawk a ni.

Zanin dar 1:15 hian Allianz Stadium-ah Coppa Italia quarterfinal khel turin Spal an mikhual dawn. Italian champion hi second division club lakah chak tura rinkai an ni, chutih rualin knockout tournament a nih avangin an fimkhur a ngai dawn.

Pirlo chuan, "Team ṭha leh khawng tam tak an awm. Chung zingah chuan Inter leh Milan hi Scudetto chawi duha tuihal an ni a, chak takin hmalam an pan bawk. Keini pawhin kan nomawi kawl lai hloh mai kan tum bik lo.

"Inelna kan hmachhawn zawng zawng kan ngai pawimawh vek, cup inelna hi chetsual a lansarh ṭhin avangin fimkhur a ngai zual. Tun ṭumah pawh hian chak thei turin kan inrem ang, chutih rualin match khelh hmabak a tam avangin rilru hman thiam a ngai," a ti.