Man United-in hma an hruai zel thei ang em?

Zanin dar 1:145 hian Manchester United-in Premier League table mawngphaha awm Sheffield United an mikhual dawn a, Ole Gunnar Solskjaer-a hote hian hnehna an chan theih chuan table-ah pakhatna an ni chhunzawm ang.

Nizan khan Manchester City-in West Brom an tlawh a, Pep Guardiola hoten point thum an hlawh chhuak a nih chuan he thu i chhiar meuh chuan Man United hi pahnihna an ni tawh ang a, Man City-in pakhatna dinhmun an luah ang

Season chanve (match 19) an khel zo a, Manchester United-in hma an hruai. Sir Alex Ferguson-a hun laiin helai hmun hi Man United awmna ṭhin a ni a, match 19 khelh zawhah ṭum riat an awm. Chutihrualin Man United-in Premier League nomawi an chawi zat erawh vawi 13 a ni a, season chanvea hma an hruai loh ṭumah pawh pakhatna an hlat ngai lo.

Sir Alex-a kaihhruai Man United danglamna chu an rilru a paukhauh a, champion thei turah an inngai tlat a, nomawi an chawi leh mai ṭhin. Ferguson awm loh hnuah Man United rilru put hmang a inthlak a, nomawi chawi teuh ṭum an nei leh tawh lo.

Nomawi chawi thiam bik Jose Mourinho kaihhruaina hnuaia pahnihna an nih ṭum pawh khan pakhatna Manchester City nen an point a inthlau hle. Tun season-ah erawh Sir Alex-a hnuaia seilian Ole Gunnar Solskjaer-a hoin kum sarih tehmeuh league nomawi an chawi loh hnuah beiseina thar an nei leh ta.

Ole Gunnar Solskjaer hnathawh tun hnaia an sawi lar chu an result hi a nei a, hemi phena a hnathawh ropui chu team a din dan hi a ni. Norwegian manager Ole hian player ṭha ringawt a melh lo a, Manchester United tana khel châk player a thlang a, hei hian rah ṭha a thlen chho zel.

December 19, 2019 aṭangin Ole-a'n Old Trafford-ah thuneihna a chelh ṭan a, a chhawr loh tur Marouane Fellaini chu player langsar a chhuahtir hmasak a ni a. Nipui bazar hmasa berah Ander Herrera leh Antonio Valencia te chu contract tawp vangin an chhuak a, Romelu Lukaku leh Matteo Darmian te man man taka hralh an ni.

Hemi hnu hian player hlawh tam uchuak Alexis Sanchez an chhuahtir thei a; Ashley Young, Chris Smalling leh Timothy Fosu-Mensah te an hralh chhuak. Chhawr loh tur player Tahith Chong, Diogo Dalot leh Andreas Pereira te intuai hriam turin an chhuahtir. Player langsar zinga mi Marcos Rojo, Jesse Lingard leh Phil Jones te tihral dan an la zawng zel bawk.

Ole-a'n duh ang zawng zawng player la lo mah se player leite erawh a hmang ṭangkai. Aaron Wan-Bissaka, Harry Maguire leh Bruno Fernandes ten hmun pawimawh an chang a, tun hnaia chhawr tam loh Daniel James pawh season khatnaah a man phu tawk a khel hman.

Tun season-a an player lak Edinson Cavani, Donny van de Beek leh Alex Telles te chu squad tih chhahna an ni rih a, Atalanta aṭanga an lak Amad Diallo hmabak êng zia chu khawtlang media te chawi tui a ni a, Facundo Pellistri erawh intuai hriam tura chhuahtir tum mek a ni.

United-in team dang ang thoin player inhliam leh Covid-19 kai an nei a, an squad chhah zarah team ṭhenkhat angin player inhliam chhuanlam siam nan an hmang lo. Sir Alex-a hunlai angin academy player-ten hmun pawimawh an chang a; Marcus Rashford, Mason Greenwood leh Scott McTominay te an ṭangkai hle.

Man United chet ṭhat chhanah player pakhat lakchhuah tur a nih chuan nikum January thlaa pound maktaduai 47-a Sporting Lisbon aṭanga an lakluh Bruno Fernandes thur chhuah a ngai. Portuguese midfielder awm hnuah team talbuai Man United-in Champions League an khel pha a, tunah phei chuan Premier League hmahruaitu an ni hial.

Fernandes hian Liverpool lakah freekick aṭangin chakna goal a khung a, hemi phenah hian chanchin ngaihnawm tak a awm. Solskjaer chuan, "Inkhel bul a ṭan dawn hi chuan ka lakah hian a hlim a, training hi a phur ṭhin hle. Liverpool nen erawh bench-ah a awm dawn tih a hria a, chawl hahdam mai loin amahin minute 45 chhung freekick training a nei. A pet dawn pawh khan a pet goal ka ring," tiin a fak.

Portuguese midfielder hian tun season inelna hrang hrangah match 29 khel tawhin goal 16 a khung tawh a, assist vawi 10 a nei tawh. A record chhuanawm tak phenah hian a rilru put hmang hi a entawntlak lehzual. Fernandes chuan, "Kum 26 mi chauh ka la ni a, chau thei ka ni lo. Tun ang kuma ka chauh mai ten kum 30 chhoah chuan ka inkhel tlak lo ang," tiin inkhel reng mai a duh thu a sawi.

Fernandes hian Premier League a khelh hnuah player of the month vawi sarih lak theih aṭangin vawi li a la a, chak duhna thinlung a nei bawk. United midfielder Fernandes chuan, "Chak loh hi ngaia neih ka duh lo. Ṭhiante, unaute leh ṭhenawmte nena kan inkhel a nih pawhin chak hi ka duh dan a ni. Hetiang rilu hi ka dam chhungin ka put ka ring," tiin a sawi.