LG Independence Cup-ah champion lai Chhinga Vengin final lut turin MPL kaithar Electric Veng chu Inrinni zan khan 2-0 in an hneh. Zirtawpni zanah Aizawl FC-in tualchhung player ṭha tamna Mizoram Police chu 4-2 in an hneh bawk.
Final hi August 15 tlai dar 4:00 ah Lammualah kheh a ni ang.
AFC 'thilpek' Gift
Aizawl FC-in Gift Raikhan-a theihna an chhawr ṭan a, Manipur coach hnuaiah counter attack leh set piece chu an innghahna lungphum niin champion rinkai zinga mi Mizoram Police an hneh.
Zirtawpni zan inkhelah hian Lalrinfela corner pet chu Lalrinchhana Tochhawng-in a tauh lut a, minute 11-na lek a ni. Minute 39-naah Rinfela corner pet chu Rinchhana'n a teammate tan tauh letin buai deuh nuaih karah Khawpuimawia'n a khung.
Second half minute lina lekah Police tihsual nangchiangin counter attack-ah Aizawl FC-in midfielder Paul Ramfangzauva hmangin a vaw let a, Kelkang tlangval Mapuia'n a tawp a khar.
Goal thum chhuah hnuah Police an beidawng lo a, an goal khung chu Aizawl FC keeper Lalremruata laka foul avangin pawm a ni lo.
Beiseina siam turin minute 56-naah R. Malsawmtluanga'n freekick aṭangin a khung a, goal dang khung belh lawk lo mah se minute li la awmin Malsawmfela'n Police goal hnihna a khung.
Hun tawp a hnai. Police beisei san lai takin AFC substitute F. Lalremsanga chu Lalfakzuala chungah foul angin Lalbiaksanga Colney hoten an ngai a, amaherawhchu referee hmuh dan a danglam avangin Lengpui tlangval Remsanga hian a khalh phei zel a, 'solo goal' khung nan a hmang a. I League club 4-2 in an chak.
Police an hliam
Mizoram Police coach Lalbiaksanga Colney chuan, "Team kan ṭan em em laia referee an ṭang duh miah loh hi chu lo inenfiah a ngai. Referee vanga chak loh ngawt hi chu rilru a na ve a ni. Min ṭan se ka ti lo, dik takin ham se kan duh. MPL-ah min ṭan lo pawh ni se tiin theihtawp kan chhuah tho ang," tiin Vanglaini a hrilh a, referee thutlukna vangin an hliam.
An hneh loh erawh Aizawl FC goal nawrtute an ni a, an goal nawr apiangin Police tlar hnung a nghing zel.
Electric a thim
Electric Veng mipui inlungrualna Inrinni zanah hmuh a ni a, Lammual mawi tham an pungkhawm a, tlang lam thlengin entu an ṭhahnem. Amaherawhchu, khelmual chhungah erawh Chhinga Veng an vannei zawk a, Electric Veng rawlthar keeper Vannunmawia chet ṭhat tawk loh chu an chakna chhan a ni.
Champion lai Chhinga Vengin inkhel an thunun thei bik lo a, goal chance insiam pawh an harsat.
Minute 36-naah Lalrinchhana freekick chu EFC keeper-in a chhût sual a, team nêm zawk tan thawhchhuah a har tawh. Second half-ah Chhinga Vengin Lalthlamuana hmangin goal hnihna an khung a, champion lai Lalsangzuala Hmar hoten harsatna nei loin final an thleng.
Electric Veng manager Lalchhanhima chuan, "Team ṭha tak lakah kan chak lo. Kan naute theithawp an chhuah a, mipui ṭawiawmna a ṭhat bawk avangin kan lawm hle. EFC-in MPL kan khel tur hian veng inpumkhatna min siamsak lehzual a, kan hlawkpui takzet. Veng mipui zai khatah min luantir ni ber e. Mitthlaah kan veng player fam ta te an lang chuai chuai mai," tiin an tum thleng pha lo mah se lawmna tur an hmuh thu a sawi.
Semifinal - Results
Aizawl FC 4 - 2 Mizoram Police FC
AFC : Lalrinchhana Tochhawng 11'; Lalkhawpuimawia 39', 49'; F Lalremsanga 90+4'
MPFC : R Malsawmtluanga 56'; Malsawmfela 86'
MoM: Lalkhawpuimawia, Aizawl FC
Electric Veng FC 0 - 2 Chhinga Veng FC
CVFC : Lalrinchhana 36'; Lalthlamuana 62'
MoM: F Lalnuntluanga, Chhinga Veng FC
Goal khung tam te
Hming Club Goal
Lalkhawpuimawia Aizawl FC 8
Lalrinchhana Tochhawng Aizawl FC 3
R. Malsawmtluanga Mizoram Police 3
