Inpeih lo Chelsea an chak

Chelsea chuan season thara an Premier League match hmasa berah Huddersfield Town chu 3-0 in an sawp a, hnehna chang mah se Blues manager Maurizio Sarri chuan an theihna tak pho chhuak tur chuan thla hnih tal an mamawh tur thu a sawi chhuak.

Inrinni zan inkhelah Chelsea tan France international N'Golo Kante (34') chuan Willian-a cross a pet lut a, defender Marcos Alonso penalty hlawh chhuah chu Jorginho-a'n (45') a khung bakah, Barcelona forward hlui Pedro pawhin (80') chak nemnghehna a khung bawk.

Khawvel goalkeeper manto ber Kepa Arrizabalaga-a'n inkhel bul ṭan nghalin hna hautak thawh tur a nei lo. Kum 23 mi Kepa hian yard 25-a hla aṭanga Alex Pritchard ball pet chu harsa lo takin a dan sak a, Huddersfield striker Steve Mounie-a'n goal ban a tih per hlauh avangin Spanish keeper-in Blues tana a match hmasa berah clean sheet a neih theih phah.

World Cup khelh vanga team training zawm tlai Eden Hazard leh Olivier Giroud te chu bench lamah hun hman tir an ni a, Belgium playmaker hi minute 76-naah dah luh niin, khelmual a luh aṭanga minute li hnu lekah Pedro goal khung tur a siamsak. France international striker erawh goal dang an mamawh loh vangin luhtir a ni lo.

Chelsea manager Sarri chuan, "Community Shield kan khelh aṭanga league match hmasa ber khelh inkar kha a harsa hle. Thawhṭanni khan player paliin min rawn zawm a, Thawhlehniah pahnih an rawn kir bawk - tunah chuan ka tan thil a awlsam chho tawh ang," a ti.

Italian manager chuan sawi zawmin, "Inelna hi eng tianga hautak leh harsa nge a nih ka inzir a ngai a, ka player-te ka hriatchian a ngai bawk. Kan dinhmun tur hi kei leh player kutah thui tak a innghat dawn, beisei dan chuan thla hnih chhungin kan insiamrem hman ang," tiin a sawi.