Tennis League a hmuhnawm

Tualchhung tennis inelna lian ber 1st Aijal Club Challerger Tennis League chu August 11, Inrinni khan Aizawl Tennis Club-ah khelh ṭan a ni a, an hlut nghal hle.

Tukin zing dar 9:00 aṭangin inelna hi chhunzawm a ni ang.

Tennis League-ah hian team panga an awm a; category paruk men's singles, ladies singles, junior singles (Under 18), 35+ doubles, open doubles leh mixed doubles hmangin inelna neih a ni. An inkhelh kual vel hnuah a sang team pahnihin August 15 hian final an khel dawn.

Category hrang hrang hi a tirah khelh hmasak ber tur dah hran a ni lo, inkhel ṭan hmain team pahnih captain ten inkhelh chhoh dan tur an pawt. Category tin hi game ruk thleng zel khelh niin, tie break a awm lo. Match tina an game hmuh zat hi a tawpah belhkhawm niin, chu chuan team pahnih inkhel result a siam avangin match tin a hmuhnawm vek.

Mizo tlangval Basil Khuma chuan K-12 Acers tan men's singles-ah Sanket Tomar chu a hneh a, ATC Love All player Udyan Bhakar chuan Mizoram number 1 Lalhmachhuana 6-5 in a hneh a, an inkhel a hmuhnawm hle. State pawn aṭangin player ṭha tak tak an tel avangin inkhel a hmuhnawm a, inkhel zawng zawng hi Zonet chuan live-in a pe chuak a ni.

Vawiin Inkhel Tur
Aijal Club Bulls 09:00 AM Aijal Acers
K-12 Acers 12:00 PM Zarkawt Xenons
Aijal Acers 04:00 PM ATC Love All
K-12 Acers 07:00 PM Aijal Club Bulls
Point Dinhmun
Team Pld Pts
Zarkawt Xenons 1 35
Aijal Club Bulls 1 32
K-12 Acers 1 31
ATC Love All 2 35
Aijal Acers 1 15
* Point-ah hian game lak zawng zawng belhkhawm a ni.