Spain jersey hliptu Pique

Gerard Pique chuan international football a chawlhsan thu a puang a, Barcelona defender hi Spain tan a inkhel tawh dawn lo. Kum 31 mi Pique hian 2009-2018 chhungin ram tan match 102 a khel a, goal nga a khung.

Manchester United defender hlui Pique hian Spain tan a khelh laiin World Cup 2010 bakah European Championship 2012-ah te khan an champion a, ram tana nomawi chawi theih lian ropui pahnih chu a chawi hman.

Catalan chhungkua aṭanga sei lian a nih avangin Pique hi Catalonia bial indan duhtu zingah a tel a, heng thu chungchangah hian ṭawngkam pawh a nei tawh. Hei vang hian Spain tan khel mah se ram tana a inlan hian fans lam aṭangin au elna tawng fo.

Spain coach atana Luis Enrique lakluh a nih hnuah Pique hian ram tan hmun pawimawh a chan chhunzawm ngei a rinawm. Amaherahwchhu, beisei loh danin thil a kal ta zawk, Russia-a World Cup khelh zawh a nih hnuah ram tan a inlan dawn ta lo a ni.

A chawlh tur thu sawiin Pique chuan, "Luis Enrique nen inbiakna kan nei a, hun rei tak aṭanga ka ruahman lawk tawh chu ka hrilh," tiin a sawi a, thutlukna siam tura a inngaihtuah uluk thu a sawi lang bawk.

Barca defender chuan sawi zawmin, "Ram tana khelhna hun ka nei thei hi ka lawm. World Cup leh Euro C'ship champion nih kha a ropui hle a ni. Mahse, tunah chuan Barca tan hun pum pek ka duh, he hmunah hian hun rei lote ka la neih hi a ṭha thei ang bera hman ka duh a ni," a ti.