Chak tura rin United leh Spurs an chak

Premier League 2018/19 season chu August 1, Zirtawpni zan khan khelh ṭan a ni a, match hmasa berah Manchester United chuan an mikhual Leicester City lakah 2-1 in hnehna an chang nghal. Season hmasa pathumna Tottenham pawhin harsa takin Newcastle an luhchhuah a, sum hmang hnem Fulham erawh an tlawm thung.

Pogba a lawm lo?

Old Trafford-ah midfielder tharum ngah Paul Pogba leh defender Luke Shaw te goal hmangin Man United-in hnehna an chang a, hun pek belha Foxes striker Jamie Vardy goal khungin awmzia a nei phak tawh lo - Jose Mourinho nauten point thum an hmu.

France tana World Cup nomawi chawitu Pogba-a'n pre season nei mumal hman lo mah se inkhel bul a ṭan nghal a, midfield lailum luahtu niin goal a khung bakah inkhel a khaikhawm ṭha hle a, minute 84-naah Marouane Fellaini chuan a rawn thlak.

A midfielder chungchang sawiin Mourinho chuan, "Pogba chu player ṭha bik a ni, minute 60 chhung vel khel thei tura ngaih a nih laiin minute 80 chuang

ṭha takin a khel thei. A inpeih em tih ka zawt a, inkhel tura thu tlukna siamtu chu amah a ni," tiin a sawi.

Kum 25 mi Pogba hi tunlai midfielder hmuhnawm leh ṭha berte zinga mi a ni a, Spanish champion Barcelona nen sawizawm a hlawh mek. Season hmasa chawhnu lama Mourinho nen boruak duhawm vak lo an neih tawh avangin a hma hun an inrin siak mek.

Juventus player hlui Pogba chuan, "I hlim loh chuan i khel ṭha thei lo ang. Ka tana sawi chhuah remchang lo a awm, ka sawi a nih chuan hrem ka ni ang," tiin a sawi a, buaina a awm ngei tih chu a lang. Pogba hian ram leh club tan player pangngai a nih reng thu a sawi a, chutih rualin boruak nuam tak hnuaiah chuan khelh ṭhat a awl thu a sawi bawk a ni.

Kum 2016 nipui lai khan Pogba hian Juventus aṭangin pound maktaduai 89 zetin United hi a zawm a, a hun lai chuan player manto ber a ni. A hun hmasa lamah khel ṭha viau mah se, season hmasa chawhnu lam khan bench-ah dah a ni fo. Inkhel pawimawh ber pakhat Sevilla nen Champions League last 16 an khelh ṭumin bul ṭantir a ni lo.

Spurs tan Ali

Jan Vertonghen-a tauh chu goalline technology hmangin a goal tih a chiang a, Newcastle lamin Joselu hmangin sut mah se England international Dele Alli chuan chakna goal a tauh lut leh - first half-a goal lut pathum hi lu hmanga tauh lut vek a ni.

Mauricio Pochettino-a'n World Cup khel - Hugo Lloris, Vertonghen, Alli, Harry Kane leh Eric Dier te chu inkhel bul a ṭan tir vek; Mousa Dembele leh Son Heung-min te chu bench

aṭanga luhtir an ni thung.

Spurs captain Lloris-a'n World Cup final-ah tihsual langsar nei mah se league-ah erawh a nihna tak a pholang leh nghal. World Cup top scorer Kane erawhin a tana anchhia 'August' thla chhunga a goal khung theih loh a chhunzawm zel rih thung.

England captain-in Newcastle penalty area-ah vawi li chiah ball a khawih, August thla chhung hian league match 15 khel tawhin; khelmual chhungah minute 988 zet hmang mah se goal a la khung lo!

Poch chuan, "Kane hi a khel chhe lo, team tan ṭangkai takin a awm a ni. Goal a la khung ngei ang tih ka chiang a, match tinah hian goal thum khung zel thei a ni bik lo," tiin a striker a chhan na hle. Argentine manager hian nipui bazar-ah player a lei lo a, a neih sa hmangin chona a hmachhawn dawn.

Inkhel dang

Premier League kai thar Fulham-in an squad thuam chak nan pound maktaduai 100 chuang hmang mah se result ṭha nen bul an ṭan thei lo. Season hmasa EPL team talbuai Crystal Palace lakah 2-0 in an tlawm a, Palace tan Jeffrey Schlupp leh Wilfried Zaha ten goal an khung.

Kai thar dang Cardiff City chu Bournemouth lakah 2-0 bawkin an tlawm a, season hmasa hmang ṭha tak Watford pawhin an elpui tura ngaih Brighton chu si hnih faiin an hneh bawk.

Inkhel Results
Zirtawpni zan
Manchester United 2 - 1 Leicester City
Inrinni zan
Newcastle United 1 - 2 Tottenham Hotspur
Bournemouth 2 - 0 Cardiff City
Fulham 0 - 2 Crystal Palace
Huddersfield Town 0 - 3 Chelsea
Watford 2 - 0 Brighton
Wolves 2 - 2 Everton