Insawifiah mamawh Lampard

Chelsea manager thar Frank Lampard chuan huaisen takin player a rem a, Derby County-a a hman thiam sa Mason Mount chu bul ṭantirin hming langsar zawk Christian Pulisic leh hliam damkawr N'Golo Kante te bench-ah an awm.

Blues vanneih ṭum ni se Tammy Abraham leh Emerson Palmieri te ball pet chu goal tura ngaih a ni a; midfield-ah ni se Mount, Mateo Kovacic leh Jorginho te ho hmaah United player-te an talbuai hle. Amaherawhchu Chelsea hian transfer tawp niah Antonio Rudiger inhliam chung rengin David Luiz an chhuah a, loh theih loin Andreas Christensen leh Kurt Zouma te an inkawp a, fimkhur loh vanga French defender penalty chawi chu an chak lohna chhan lian ber a ni.

Chelsea manager hlui Jose Mourinho chuan Lampard hi a player thlan chungchangah a sawisel a, Abraham leh Mount aiin Kante leh Olivier Giroud te chu bul ṭantir tur an nih thu a sawi. Blues manager Lampard chuan, "Medical room aṭangin inkhel turin player ka la chhuak thei lo. Minute 45-60 kha chu team ṭha zawk kan ni chiang a, mimal tihsual vangin goal kan chhuah. Shot vawi nga an neihah vawi li an ti goal a nia, kan tan chuan a na a ni," tiin a insawifiah a, Mourinho chu 'pundit' a nih avanga eng emaw a sawi a ṭul thu a sawi ve bawk.

Manchester United-in an ban hnuah Mourinho hian club a la enkawl leh lo a, Sky Sports-ah football expert anga ṭhuin a thusawi a ngaihnawm nghal hle. Portuguese manager chuan, "Tun season-a champion thei team pali chu Man City, Tottenham, Liverpool leh Man City B team te an ni. City inkhel ka hmu a, bench-a awm ho khan nomawi an chuh phain ka hria," tiin Arsenal, United leh Chelsea aia Man City B team an ṭhat thu a sawi.



Share this Post

Login to comment
No Comments