Spurs-ah Davies leh Winks an nghet

Tottenham Hotspur chuan an player duhlai pahnih Ben Davies leh Harry Winks te chu hun rei zawk atan an thlung nghet a, season nga daih contract thar an ziahpui.

Wales defender Davies hian July, 2014 khan Swansea City aṭangin Tottenham hi a zawm a, North London club tan hian match 168 khel tawhin season liam ta khan player pawimawh a ni phak.

An academy aṭanga inzir chhuak Winks pawh senior team tan match 104 a khel tawh, kum 23 mi hian season hmasa khan inelna hrang hrangah match 41 ngawt a khel a, a club hi Premier League-ah palina niin Champions League final an thleng hial bawk.

England midfielder Winks chuan, "Kum nga mi chauh ka nih laiin he club-ah hian ka awm tawh a, senior team tana ka inlan chauh pawh a lawmawm rualin hun rei tak atan contract ka ziak leh thei hi ka lawm hle," a ti. Davies pawhin chona thar hmachhawn a chak tawh thu a sawi ve bawk.



Share this Post

Login to comment
No Comments