Gauff mumang ti tawptu Halep

School naupang mai la ni mah se Coco Gauff chanchin hi kumin Wimbledon ngainatute ngaihven a ni a, American tleirawlin beisei aia ṭhaa inelna a hmachhawn kaltluang lai chu world number 1 hlui Simona Halep lakah a tawp.

Thawhṭanni zan last 16 inkhelah Halep hian darkar khat leh minute 15 chhung chauhin kum 15 mi Gauff hi 6-3, 6-3 in a hneh, seeded pasarihna Halep hi atan player a hmachhawn tawh zinga ranking sang ber a ni a, a mumang nuam tak ti tawptu a ni nghal bawk.

Wimbledon khel zinga naupang ber Coco Gauff chuan, "Hringnun ka hman ve tawha chawlh kar nuam ber chu a ni. Thil tam tak ka zir chhuak a, mipui tam tak hmaa inkhelh ringawt pawh kha ka tan chuan zirlai a tling, beidawng loa beiseina nei tlat ṭhin ka nihna pawh midangin an zir chhuah ve ngei ka beisei," a ti.

Vawi sarih a champion tawhna hmunah Serena Williams a hrang chhunzawm a, American star hian world number 31 Suarez Navarro chu 6-2, 6-2 a hnehin quarterfinal a in vaw kai - a hmachhawn leh tur chu world number 1 Ashleigh Barty hnehtu Alison Riske a ni ang.

Kum 37 mi Serena hian hnehna chan a lawm rualin thu lawmawm loh a tawng, practice session an neih laiin a racquet hmanga court hmun ṭhenkhat a vuak chhiat avangin £7,988 (Rs 6,83,145) chawitir a ni.

Grand Slam vawi 23 champion tawh Serena hi singles bakah mixed doubles-ah a inlan kawp bawk, khawtual tlangval Andy Murray nen ṭangdunin an match hmasa berah hnehna an chang tawh. Serena chuan, "All England Club hi chu a nuam, kar dang zawng aiin match ka khel hnem a, ka taksa chau deuh mah se nuam ka ti hle," tiin a sawi.

Hmeichhe last 16 inkhel dangah beisei loh result hmuh tur a awm chhunzawm, seeded pathumna Karolina Pliskova chu Karolina Muchova lakah 4-6, 7-5, 13-11 in a tlawm - world number 68 Muchova hian tennis a khelh hun chhunga a vawi khat nan Grand Slam quarterfinal a in vaw kai ve chiah.



Share this Post

Login to comment
No Comments