Kar thum chawl tur Shikhar Dhawan

Australia laka century siamtu Shikhar Dhawan chu a kutzungpui ruh a tihtliah avangin kar thum chhung a chawlh a ngai dawn.

Pathiannia India leh Australia te Oval-a an inkhelh ṭum khan Dhawan hi a kutah vawm per a ni a, hliam nei chungin run 117 zet siam mah se tunah erawh a chawlh rih a ngai dawn.

Thawhṭanni khan Dhawan-a kut hi 'scan' a ni a, Cricket World Cup-a India khelh hmabak New Zealand, Pakistan, Afghanistan, West Indies leh England an hmachhawn hunah a inlan thei dawn lo.

Dhawan hi India team-ah player pawimawh tak a ni a, ICC tournament-ah century vawi ruk a siam tawh a, 2015 World Cup-ah khan ṭum hnih century a siam.

Tun dinhmunah chuan KL Rahul chu Rohit Sharma bul ṭanpui tur a nih a rinawm a, Dhawan thlakna tur erawh Dinesh Karthik emaw Vijay Shankar te an nih ringtu an tam a, chutihrualin team chhung boruak hre pha chinin Shreyas Iyer emaw Rishabh Pant ten khelhna hun an nei dawn niin an sawi thung.

India chuan Ningani tlai hian champion rinkai zinga mi New Zealand an hmachhawn dawn a, hnehna an chang a nih chuan semifinal a hnai sawt ang.

Cricket World Cup hi ruahsur vangin a buai chho a, nimin Bangladesh leh Sri Lanka inkhel tur pawh he thu ziah lai thleng chuan an la inkhel ṭan lo.

Vawiin tlai dar 3:00 hian Australia leh Pakistan te County Ground, Taunton-ah an inkhel dawn a, hei pawh hi ruahsur vanga buai thei dinhmunah a ding.



Share this Post

Login to comment
No Comments