Nations League champion hmasa ber Portugal

Inelna thlengtu Portugal chuan Pathianni zan khan Netherlands chu 1-0 a hnehin Nations League champion hmasa ber an ni. Estadio do Dragao-ah Goncalo Guedes chuan minute 60-naah goal awmchhun a khung a, Cristiano Ronaldo captain-na hnuaia khel Portugal hian kum thum chhungin nomawi pahnih an chawi.

Kum 2004 khan rawlthar duhawm Ronaldo telna Portugal chuan Euro C'ship final-ah Greece hneh loin an tlawm a, inkhelh banah Ronaldo hi hnem theih a ni lo. Tun ṭumah erawh inelna thlengtu Portugal an chesual nawn lo a, Ronald Koeman hnuaia intuai thar Netherlands an hneh.

Portugal hi an player neih dan thlirin Europe-a football thiam ber ram tih tur an ni lo a, khawvel huapa lar Eusebio leh Luis Figo te an kawl lai pawhin an champion thei lo. Amaherawhchu, Europe-a player ṭha ber Ronaldo an neih hnuah major tournament-ah ṭum hnih nomawi an chawi ta.

Final bikah erawh Ronaldo aiin Bernardo Silva a khel ṭha zawk a, Manchester City midfielder ball pass chu Goncalo Guedes-a'n goal-ah a chantir. Netherlands chance neih ṭhat ber erawh Memphis Depay-a'n goal-ah a chantir thei lo.

Semifinal-a hattrick siamtu Ronaldo chu goal khung tam ber niin Alipay Top Scorer Tropy a dawng. UEFA technical observer-te chuan Bernardo Silva chu player of the tournament-ah an thlang a, Frenkie de Jong chu young player of the tournament-ah thlan a ni.

Nomawi piah lam

Thawhlehni aṭang hian international transfer a inhawng ṭan dawn a, Nations League final pawh hi club lian tam tak chuan player ṭha zawn nan an hmang ang.

Portugal midfield luah-lumtu Bruno Fernandes chu Manchester United leh Tottenham Hotspur ten an inchuh mek a, kum 24 mi midfielder hian season liam ta khan Sporting Libson tan khelin goal 32 leh assists vawi 17 ngawt a nei a. Final-ah pawh Bruno hian shot vawi ruk a nei a, Netherlands keeper Jasper Cillessen tan hna a siam tam hle.

Bruno hi thla liam ta khan Manchester City nen sawi zawm a ni a, pound maktaduai 47 man vela ngaih a ni. Amaherawhchu tunah chuan pound maktaduai 68 man vel a ni chho leh tawh a, Man United nen an inhnaih viaua sawi ni mah se an jersey an pawh pharh hma hi chuan engmah chiang a la awm lo.

Netherlands defender Matthijs de Ligt tihsual vangin England-in goal an khung a, Ajax defender hian insiamṭhain a tihsual thup nan goal a khung. Final-ah pawh Ajax captain De Ligt hi a rintlak leh a, kum 19 mi lek ni mah se Virgil van Dijk nena an inkawp chu 'club level'-ah pawh an awhawm hle. Dutch defender hi Barcelona nen sawi zawm  a ni a, amaherawhchu sum 

ṭhahnem tak theh chhuak ngam an awm a nih chuan a rilru la thlak theih a ni ang.



Share this Post

Login to comment
No Comments