Australia tan beisei a bo lo

Nizan Australia leh Denmark inkhel hmuhnawm takah chak zawk awm loin 1-1 in an ṭin a, Denmark dinhmun ṭha mah se an hmaa la ding tur hi France an nih avangin Group E dinhmun a la chiang lo.

Nizan khan Group E-ah France leh Peru an inkhel bawk a, he thu buatsaih lai hian an result kan hre hman lo. Australia-in draw result an neih avangin an dinhmun a derthawng tih hai rual a ni lo a, beiseina nei lo erawh an ni lo.

Denmark tan Christian Eriksen chuan ram tana a a match hnuhnung 15-a goal 18 (13 goals, 5 assists)-a a inrawlhna ni turin goal a khung a, Mile Jedinak chuan Australia tan penalty hmangin a sut.

Denmark an ṭha

Inkhel ṭantir lamah Denmark chu team hmuhnawm zawk an ni a, goal khung tur pawhin hun an mamawh rei lo. Minute sarihna lekah Christian Eriksen chuan goal hmahruai a khung a, Tottenham midfielder tana duhthusama siamsaktu Nicolai Jorgensen chu fak phu a ni.

Denmark-in inkhel an thunun chhunzawm a, France laka an khelh dan avanga fak hlawh Australia-in beisei an phak lo–hun rei tak chhung Antoine Griezmann, Kylian Mbappé leh Ousmane Dembele te dah nil theitu Australian team inremkhawm fuh em em kha hmuh tur a awm lo.

Captain Cool

Australia-in ngawi renga Denmark che vel en reng an tum bik lo. Minute 35-naah corner aṭanga ball lokal chu Mathew Leckie-a'n Yussuf Poulsen kutah a tauh per a, referee-in hmu lo mah se video assistant referee a awm tawh miau avangin VAR hmanga ennawn a ni.

Ennawn a nih hnuah referee-in penalty a pe a, France laka 'cool' zeta lo pet goal tawhtu Mile Jedinak a lo pen chhuak a, Aston Villa midfielder hian Kasper Schmeichel-a vene pet goal turin harsatna a nei lo–Kasper-a'n ram tana minute 571 zet goal a chhuah tawh loh chu tih tawp a ni.

Hei le Australia

Australia-in inkhel ṭantir lamah beisei phak lo mah se chawlhlawk hman a nih hnuah an khel ṭha sawt–Huddersfield midfielder Aaron Mooy, Celtic attacking midfielder Tom Rogic leh Hertha Berlin midfielder Leckie te chu player hmuhnawm an ni.

Denmark tan erawh chanchin lawmawm lo a awm a, tlarhmaa an rinrawl Yussuf Poulsen chu a yellow card pahnihna a hmuh avangin France an hmachhawn hunah a inlan thei lo ang.



Share this Post

Login to comment
No Comments