Nigeria an ṭha zawk - Iceland coach

Iceland coach Heimir Hall­grimsson chuan World Cup-ah an team hmachhawn tur a zirin an khelh dan an tih danglam vak chuan loh thu a sawi a, zanin dar 8:30-a an hmachhawn tur Nigeria chu anmahni aia ṭha zawk an nih thu a sawi bawk.

Group D aṭanga rinkai pahnih Argentina leh Croatia te nizanah an intawng a, result kan hre hman lo. Iceland leh Nigeria inkhela chak zawk an awm a nih chuan last 16 luh beiseina a la awm ang. Nigeria hi an match hmasa lamah an tlawm tawh avangin an chak lo nawn a nih chuan an tan puanthuah tel a ngai thung dawn a ni.

Tun hma lamin ram pahnihte hi vawi khat chiah an la intawng, 1981 khan friendly match an khelh ṭumin Iceland hian 3-0 in hnehna an chang.

Iceland hi...

World Cup khel zinga ram te ber Iceland hian an match hmasa berah champion tura rinkai Argentina chu 1-1 in an inhnehtawkpui a, Lionel Messi awmna team an dan theih avangin zaninah pawh beiseina an nei sang thei ang.

Hallgrimsson chuan, "Nige­ria lakah pawh rinkai zawk kan ni leh chuang lo, keini aia team ṭha leh khawng zawk an ni. Mahse, Argentina kan hmachhawn ṭum khan player 

ṭhenkhat chuan beisei aia ṭhain an khel, tun ṭumah pawh hian minute 90 chhung chu ka nauten an theihna zawng zawng an hlan leh ngei ka beisei," tiin a sawi.

Iceland tan hian Argentina an hmachhawn ṭuma hliam tuar Johann Berg Gudmundsson a inlan theih a la beiseiawm loh a, amah thlaktu Rurik Gislason chuan a hmun ruak a luah chhunzawm tura ngaih a ni.

Euro 2016-a an inlan kha Iceland tan major tournament hmasa ber a ni a, khawvel bara­khaihin quarterfinal an thleng - a thlengtu France ngam lo mah se an tawn chin hi a ṭha hle. Russia-ah pawh beisei aia

ṭhain bul an ṭan leh a, ram tana a match hnuhnung pathuma goal thum khung thei striker Alfred Finnbogason leh Everton midfielder Gyfil Sigurdsson te chu an hmachhuan tur a ni ang.

Naupang rual

Kumin World Cup khel zingah Nigeria hi chawhrualin an kum a naupang ber a, huaisen takin Croatia hmachhawn mah se an vanneih loh bakah hman aṭanga an buaina ngai set-piece chinfel dan an la hre lo tluang zel niin a lang.

1994 World Cup aṭanga inlan tawh Nigeria hian football khawmpui liana an goal chhuah tawh belhkhawm chu 27 a ni a, heng zinga goal 14 (52%) chu set-piece aṭanga an chhuah a ni, anni aia record nei chhia an awm lo - heng zingah hian Croatia nen an intawn ṭuma corner aṭanga ball lo kal Oghenekaro Etebo-a'n anmahni lama a tih luh pawh a tel.

Goal an chhuah nasat avangin Super Eagles-in chak ni hmel an hmu khat hle. World Cup match an khelh hnuhnung 13 aṭangin vawi khat chiah hnehna an chang a, World Cup hnuhnung pahnihah group stage an paltlang loh bawk avangin Iceland hi an hneh ngei ang a tih ngawt theih loh. Chutihruala an hmachhuan tur pakhat chu European team laka record an nei ṭha hi a ni, World Cup match nga an chak tawhna chu Europe ram lakah vek a ni.



Share this Post

Login to comment
No Comments