Stan Wawrinka a tla leh ta

A khup hliam a dam hnuah pawh Stan Wawrinka-a'n tennis racquet a la hum fuh hleithei rih lo. Grand Slam vawi thum champion tawh Wawrinka hi Fever-Tree Championship-ah inlanin Sam Querrey a hneh loh avangin second round a paltlang zo lo.

Queen's Club, London-a inkhelah Wawrinka hian break point vawi 12 ngawt a hmuh a chhawr ṭangkai thei lo vek a, American tlangval lakah 7-5, 6-7 (3-7), 6-1 in a chak lo.

Swiss star Wawrinka-a'n set khatna bikah 5-4 a nih laiin set point vawi nga a hmuh a ti hlawhtling zui thei lo a, inkhel pumpuiah a khingpui service hi vawi khat chiah a chhuhsak thei a ni. Querrey erawhin a ball vuak nat chhawr ṭangkaiin vawi 25 ngawt aces a vaw chhuak thung.

Inkhel dangah Marin Cilic chuan set hmasa hloh mah se Gilles Muller lakah 4-6, 6-3, 6-3 in hnehna a chang thei a, US Open champion tawh Cilic leh 2010 champion Querrey te hi an intawng zui leh dawn a ni.

Wimbledon inbuatsaihna tournament-ah hian Andy Murray pawh a rawn kir a, mahse world number 1 hlui Murray hi world number 21 Nick Kyrgios lakah 2-6, 7-6 (7-4), 7-5 a tlawmin a zinkawng a lo tawp tawh bawk.

Champion tura rinkai Novak Djokovic chuan a match hmasa berah harsatna nei loin a tlang a, Serbian tlangval hi nizan khan second round-ah inlan zui lehin he thu buatsaih lai hian an result kan hre hman lo.



Share this Post

Login to comment
No Comments