Foxes-ah midfielder thar

Leicester City chuan midfielder James Maddison chu Norwich aṭangin an lalut. Maddison hian King Power Stadium-ah kum nga cham turin contract a ziak a, a man zat hi tarlan ni lo mah se khawthlang media-te chuan pound maktaduai 20 man vel niin an sawi.

Tun nipui bazar chhungin Leicester manager Claude Puel chuan defender pahnih Jonny Evans leh Ricardo Pereira te a lalut tawh bawk a, kum 21 mi Maddison hi an player thar pathumna chiah a ni.

Foxes manager Puel chuan, "James hi English rawlthar zinga beisei awm leh theihna nei sang a ni a, ani kan lalut thei hi a lawmawm hle. Season hmasa khan Norwich City tan hna ropui tak a thawk tawh a, Premier League lamah pawh player hmuhnawm a nih phak ngei kan beisei," tiin a sawi.

England Under-21 midfielder Maddison hian season hmasa khan goal 15 ngawt a khung a, PFA's Championship team of the year-ah thlan tel niin kum naupangte ni mah se khelmual chhungah a puitling tawh hle.



Share this Post

Login to comment
No Comments