A thiam 16 zingah Uruguay leh Russia

Uruguay chuan Nilaini zan khan Saudi Arabia 1-0 in an hneh a, world champion nih an tumna kawngah FIFA World Cup last 16 an lut.

Saudi Arabia-in an match hmasa ber aṭanga tehin nasa takin hma sawn mah se goalkeeper Mohammed Al Owais chet sual an tuar a, Luis Suarez chuan he inkhela goal awmchhun a khung.

La Celeste (Uruguay sawina)-in last 16 an luh rual hian inelna thlengtu Russia chu a thiam 16 zingah an tel chiang bawk a, Egypt leh Saudi Arabia erawhin match khat la hmabak mah se Russia-ah beisei tur an nei tawh lo.

Suarez 100; not out

Luis Suarez-a'n Uruguay tan a match 100-na a khel a, goal a khung bawk. Kum 31 mi forward goal khung danah erawh Saudi goalkeeper Al Owais dem theih a ni a, corner aṭanga ball kal a chhutsual avangin Suarez-a'n goal a khung theih phah.

Liverpool forward hlui hian ram tan match 100 a khelh aṭangin goal 52-a khungna chiah a ni a, Uruguay tana goal khung hnem ber a ni mek. Suarez hian Egypt nena an match hmasa berah beisei phak lo mah se Saudi lakah erawh a hmuhnawm a, Edinson Cavani nena an inkawp chu a hmuhnawm thei le.

Hetihrual hian Suarez-a'n minute 90 tluanin a theihna erawh a pholang thei lo–Saudi defender Ali Albulayhi chuan Barcelona forward hi a kalna apiangah a zui a ni ber a, hmun awl a nei thei tawh meuh lo.

Saudi thar zawk

Green Falcons (Saudi sawina)-in an match hmasa berah 0-5 ngawtin Russia an ngam lo a, Asia aṭanga khel team hian sawisel an hlawh a, coach Juan Antonio Pizzi chuan thil zahthlak tak a nih thu a sawi.

Uruguay lakah erawh Saudi thar kan hmu a, an khel a hmuhnawm a, ball an chang tam a, tlarhmaa Suarez leh Cavani ten hmun awl an neih loh nan an veng uluk bawk. He team hi an coach hlui Bert van Marwijk enkawlna hnuaia qualifier-a team hmuhnawm tak ang kha an ni leh tawh–an harhchhuah erawh a tlai a ni.

'Saudi Modric' tia hminglem an pek Al Hilal midfielder Abdullah Ateef-a'n Luka Modric nena khaikhin an nih chhan pholangin a khel ṭha takzet a, Al Hilal midfielder Mohamed Kanno leh season hmasaa Levante lama loan-a hun hmang Fahad Al-Muwallad te an khel ṭha bawk–anni pathum hi season tharah Europe lamah kan hmu a nih pawhin a mak lo ang.

Hmabak chu

Thawhṭanniah Group A-in group stage match an khel zo dawn a, last 16 khelh chhan tur a awm tawh lo–zan dar 7:30-ah team pali an inlan kim vek dawn.

Egypt leh Saudi Arabia inhmachhawn turah beisei tur awm tawh lo mah se 'hmingṭhat hlawh' chu an inkhelh chhan tur a ni a, team pahnih hian point an la hlawh chhuak lo ve ve.

Hetihrual hian Uruguay leh Russia kalkawng a awlsam dawn lo–an inkhel tur hi group hmahruaitu inchuhna tur a ni dawn a–Spain/Portugal/Iran khawi emaw ber hi an hmachhawn ang.



Share this Post

Login to comment
No Comments