West Ham player manto ber Issa Diop

Premier League club West Ham chuan an player manto ber ni turin Toulouse defender Issa Diop chu kum nga chhung atan pound maktaduai 22-in an lalut a, Swansea goalkeeper Lukasz Fabianski pawh pound maktaduai sarihin an lei bawk.

France Under-21 international Diop hian Ligue 1 club tan match 95 a khel hman a, kum 21 mi chauh la ni mah se a seilenna club tan player rinrawl a ni phak der tawh - season hmasa bikah league match 26 a khel a ni.

West Ham manager Manuel Pellegrini-a'n tun nipui chhungin English defender Ryan Fredericks chu Fulham aṭangin free transfer hmangin a lalut tawh a, Diop leh Fabianski te nen player thar pathum an nei chiah.

Kum 33 mi Fabianski-a'n season hmasa kha hmang ṭha viau mah se, a team chu Premier League-ah a inhamtan pui zo lo. Poland international hian Championship lama hun hman ai chuan inelna sang hmachhawn a duh avangin Hammers a zawm.

Arsenal tan pawha khel tawh Fabianski chuan, "Hmun nuam tak ka pan thei hi ka lawm hle. Khelmual chhung leh a pawnah club tana mi ṭangkai nih theih ngei ka beisei a, chona thar hmachhawn ka chak tawh takzet," tiin a sawi.



Share this Post

Login to comment
No Comments