Penalty hlah Messi hmaah Modric

Penalty a chhuih luh loh avanga sawisel hlawh Lionel Messi tan fiahna hautak zawk a thleng dawn. Messi awmna Argentina chuan kumin World Cup an match hnihna atan Croatia an hmachhawn dawn a, zanin dar 11:30 hian Nizhny Novgorod Stadium-ah an intawng ang.

Barcelona thiampuipa Messi-a'n an match hmasa berah Iceland lakah an ram a chakpui zo lo a, Real Madrid midfielder Luka Modric erawhin penalty chhuih lutin Croatia chu Nigeria lakah a chakpui thung.

Vatreni (Croatia sawina) hian kum 20 chhunga World Cup bul an ṭan ṭhat ber ṭum tawngin, an chak nawn a nih ngat chuan Group D aṭanga last 16 lut mai thei dinhmunah an ding. Jorge Sampaoli naute erawhin hnehna an chang zo lo zui a nih vaih chuan an tan knock out round luh a harsa tawh ang.

Ram pahnihte hi tun hmain vawi li an intawng tawh a, Argentina hian vawi hnih hnehna changin Croatia hi vawi khat an chak thung–ṭum khat dang an inhnehtawk. Record hlui en let chuan South American ram an chungnung zawk a, Russia bikah chuan European team hi group hmahruaitu an ni mek.

Messi dan an tum

World Cup khelh ṭan a nih hmain Ivan Rakitic chuan Barcelona lama a khelhpui Messi chu dan theih loh a nih thu a sawi lawk tawh. Mahse, Russia pan zinga ram te ber Iceland mahin minute 90 chhung Argentina captain hi an dang thei a, Croatia coach Zlatko Dalic pawhin an dan theih a beisei.

Croatia coach Dalic chuan, "Ivan lak aṭangin hriat tur pawimawh zawng zawng chu kan hria ang. Lionel Messi dang tur hian eng ruahmanna pawh a tling tawk lo ang tih chu hriat sa a ni a, chutihrualin hei erawh hriat tel a ṭha. Player ṭha fal pakhatin result a siam danglam thei a nih chuan, team ropui chuan result ṭha zawk a siam thei ngei ang," tiin an thawhhona chu an hmachhuan tur a nih thu a sawi.

Nigeria laka midfielder pali hmangtu Dalic-a'n an match hmasa aṭangin player a siksawiin a rinawm, training-na lama a lan danin ram tana match 100-na khel thei mai tur defender Vedran Corluka leh a ṭhian ten hna hautak thawk turin an inpuahchah–Iceland angin tlarhnungah an inremkhawm a nih pawhin a mak lo ang.

Tlarhma lamah striker Nikola Kalinic chu Nigeria laka bench aṭanga a luh duh loh vangin thawn haw a ni a, hei vang hian Juventus striker Mario Mandzukic chu innghahna tlaka a khelh a ngai dawn.

Captain Modric, Barcelona midfielder Rakitic leh winger Ivan Perisic te an langsar a, African team an hneh ṭuma an goal nawrna thapui pawimawh erawh Andrej Kramaric a ni. Hoffenheim forward hi Mandzukic hnung chiahah dah ṭhin a ni a, an match hmasa anga an inrem leh a nih chuan Argentina midfielder Javier Mascherano tan ven ngun a ngai khawp ang.

Goal hmasa ber

2006 March thla khan Argentina leh Croatia ten friendly match an khel a, he inkhelah hian Messi-a'n ram tana a goal hmasa ber a khung. Barcelona forward hian Croatia a hmachhawn hnuhnung pahnihah goal a khung ve ve bawk avangin Zlatko Dalic-a naute tan chuan ani hmachhawn hi thil chakawm tak a ni lo.

Kum 30 mi Messi hian Argentina tan match 124 a khelh aṭanga goal 64 khungin an ram tana goal khung hnem ber a ni tawh a, Iceland laka goal shot vawi 11 neitu hian Croatia lakah Russia World Cup bika a goal hmasa ber khung a tum dawn.

Argentina manager Sampaoli chuan, "Thil thleng aṭang khan kan inzir tawh a, kan chak lohna lai thuam ṭhat dan tur kan hre bawk," tiin a sawi. World Cup hnuhnung zawk final-a Germany hneh lo tu hian champion an tum a nih chuan an ṭhat dan bera an khelh chhuah a hun tawh hle.

Manchester City striker Sergio Aguero-a'n football khawmpui lian berah a goal hnihna khung a tum dawn a, Manchester City striker bakah hian Juventus hmatawng Gonzalo Higuain pawhin hun a nei a nih chuan, inelna lian a hmachawn tawha beisei a phak loh ṭhinna hliahkhuh turin a theihna tak a lantir a hun tawh.

La Albiceleste (Argentina sawina) hian hmatawng nei ṭha chungin goal khung an harsat a ni satliah lo a, Iceland lakah pawh an tlarhnung a nghin avangin ball thiam rual awmna Croatia hmachhawn tur chuan Sampaoli-a'n a defender-te a remkhawm thiam a ngai khawp ang.



Share this Post

Login to comment
No Comments