Barcelona an tho chhuak ang em?

Athletic Bilbao-in an mual San Mames-ah Barcelona 2-1 in an hneh a, zanin dar 1:45 hian Nou Camp-ah Copa del Rey Last 16 second leg khelh a ni dawn. Luis Enrique hote an tho chhuak thei lo a nih chuan Spain rama knockout inelna ngaihhlut Copa del Rey-ah beisei tur an nei tawh lo ang.

Messi Goal

First leg-ah Barcelona tan Lionel Messi, Luis Suarez leh Neymar ten inkhel bul an ṭan vek mah se Atletico-in minute 30 chhungin Aritz Aduriz leh Inaki Williams hmangin goal hnih an khung.

Catalan club-in an siphurh sut thei lo mah se second leg a awm miau avangin San Mames-a Messi goal khung a pawimawh ang. Argentina captain Messi hian minute 51-naah freekick aṭangin a khung a, Barcelona hi team ṭha zawka ngaih an nih bawk avangin quarterfinal lut tura rinkai zawk an la ni fan.

Kim leh kim lo

Athletic Bilbao-in first leg-a hnawhchhuah Raul Garcia leh Ander Iturraspe te an chhawr thei dawn lo. Spanish midfielder bakah hian goalkeeper Kepa Arrizabalaga chu Pathiannia Alaves nen goal awm loa an inhnehtawk ṭuma a inhliam avangin a khel dawn lo bawk.

Barcelona coach Enrique erawh Dutch keeper Jasper Cillessen a dam tawh avangin duh thlan tur goalkeeper a kawl. German keeper Marc-Andre ter Stegen-a'n tihsual lian tham nei lo mah se tih ṭhat bik a neih chuang loh avangin Cillessen a lut a nih pawhin a mak lo ang.

Rinkai zawk Barca

Barcelona-in Copa del Rey an la thu tak a, Thawhṭanni zana Zurich-a neih Best FIFA Football Awards-ah Messi tiamin player pakhatmah an kal lo.

Nou Camp-ah Barcelona-in record an nei ṭha a, an muala match hnuhnung pathumah chak vekin  an goal khung belhkhawm pawh 15-1 a ni. Bilbao hian Nou Camp an tlawh hnuhnung pariata vawi sarihah an chak lo a, vawi khat dang an inhnehtawk. Ernesto Valverde enkawl Bilbao-in Barcelona muala hnehna an chan hnuhnung ber chu November 2001 daih tawh kha a ni.

Barca an ṭha tawk?

Luis Enrique-a chhawr theih turin Messi, Suarez leh Neymar te an awm a, MSN an awm chuan an ṭha tawk. Amaherawhchu an dinhmun aṭanga thlir chuan Barcelona hi chak lo thei an ni tih a chiang lehzual.

La Liga-ah Barcelona hian an elpui Real Madrid aia match khata an khel tam chungin point ngain an pha tawh lo a, club inhal tak inkarah Sevilla an la awm bawk. Spanish manager Enrique-a'n an khelh ṭha thu a sawi tho a, Barca boss thusawi hi a dik a nih pawhin a duh dan a hniam deuh pawh a ni thei ang.

Messi elpui Cristiano Ronaldo-a'n Best FIFA Player chawimawina a dawng a, Argentina captain hian mimal inelnaa a dinhmun phet siam ṭha turin club leh ramah result ṭha a mamawh. Argentina captain hi tun hma ang thoin a la rintlak a, match hnuhnung bera Villarreal nen an inhnehtawk ṭum pawhin siphurh suttu a ni. Messi-a'n tih theih chin a nei a, Suarez leh Neymar ten goal khung kawngah an thlawp ṭhat a ṭul a ni.



Share this Post

Login to comment
No Comments