Champion lai City an Chak

St James Park-ah Manchester City-in FA Cup semifinal lut turin Newcastle United 2-0 in an hneh. City goal hnih hi Kevin De Bruyne leh Raheem Sterling ten an khung.

Pathianni zan inkhelah Man City an vannei a, Newcastle defender Fabian Schar-a'n ṭul miah loah Gabriel Jesus a nam avangin penalty a chawi. Belgian midfielder De Bruyne lo pen chhuakin Newcastle keeper Karl Darlow a bum a, minute 37-naah goal hmahruai a khung.

Second half-ah Andy Carroll thlaktu Dwight Gayle-a'n siphurh sutna hun ṭha a nei a, amaherawhchu hnai tak aṭangin goal zawnah a pet lo. Man City-in nuam sa zawka hnehna an chan theih nan Raheem Sterling-a'n minute 68-naah box pawn aṭangin mawi zetin a pet goal a, 2-0 in hnehna an chang.

Manchester City manager Pep Guardiola chuan, "Goal an venhim nasat avangin goal nawr a harsa a, hnehna kan chan avangin kan lawm. Semifinal kan thleng a, season liam taa nomawi kan chawina Wembley Stadium kan thleng leh ta," tiin a sawi a, Champions League-a Real Madrid hmachhawn tura an inpuahchah ṭan tawh thu a sawi.

Guardiola hian England-a nomawi lak theih zawng zawng a chawi tawh a, FA Cup leh Premier League zawha khelh ṭna tur Champions League lama rilru a pe ṭan hi a mak lo.



Share this Post

Login to comment
No Comments