Ka enkawl tawh zinga ṭha ber chu Ronaldo - Capello

Fabio Capello chuan player a enkawl tawh zingah Ronaldo chu theihna nei sang ber tiin a sawi a, mahse Brazilian striker nungchang ṭha tawk lo chuan harsatna a siamsak hnem thu a sawi tel bawk.

Italian coach kaihhruaina hnuaiah Ronaldo hian Real Madrid-ah khan thla ruk chhung a khel, Spanish club lian tan hian match 177 a khelh aṭanga goal 104 a khung hnuah 2007 January thla khan AC Milan lama hralh a ni.

Capello awm hnuah Ronaldo tan hun hnuhnung a ni tawh a, hmun nghet a chang meuh lo. Zu in leh intihhlimna hmuna kal a hrat a, a tau bawk. Dutch striker Ruud van Nistelrooy chu hmun lailum changtu zawk a ni.

Capello chuan, "Player ka enkawl tawh zingah chuan Ronaldo kha talent nei ṭha ber a ni a, chutih rualin dressing room lama buaina min siamsak hnem ber chu amah tho hi a ni bawk.

"Zu a in a, party-na hmun leh intihhlimna hmun khawiah pawh a kal emawni tih mai tur a ni. Ṭum khat chu Ruud van Nistelrooy chuan dressing room chu zu rim hlir mai a nih thu min hrilh hial a ni," tiin a sawi.

Italian coach chuan sawi zawmin, "Ronaldo a chhuah hnu khan result kan nei ṭha zawk, boruak ṭha kan neih tawh vang a ni. Buaina ni loin, talent nei ṭha kan sawi erawh chuan ani kha a ṭha ber a ni," tiin a sawi.

Milan a pan dawn hian Capello leh Ronaldo boruak a ṭha tawh lo hle. Brazilian legend chuan, "Min thlawp tlattu fans leh ka khelh pui player zawng zawng, coach ka hrawn tawhte chungah ka lawm takzet, pakhat tiam lohin," tiin Madrid khawpui a chhuahsan dawn hian Capello chungah a lawm lo.



Share this Post

Login to comment
No Comments