Covid-19 lakah Marinakis a fihlim

English football kaihhnawiha tel zinga coronavirus kai hmasa ber Nottingham Forest leh Olympiakos neitu Evangelos Marinakis pawh a dam tawh. Marinakis chuan, "Covid-19 dona kawngah mahni hmasial a thiang lo," tiin natna ṭihbaiawm hneh turin thawhhona ṭha a pawimawh thu a sawi.

Kum 52 mi Marinakis hian February 28 khan Emirates Stadium-a Arsenal leh Olympiakos te inkhel a en a, March 7-ah Forest leh Millwall inkhel a en leh bawk. Greek pachal hian England-a awm laiin Covid-19 natna a vei tih hmuhchhuah a ni lo a, Greece-a a let leh hnuah chauh a vei tih hmuhchhuah a ni.

Marinakis chuan, "Kar hnih chhung uluk taka ka inkhel hnuin endik leh ka ni a, Covid-19 aṭangin ka fihlim. Greek National Health system doctor-ten duat taka min enkawlna leh thurawn min pekah ka lawm a, min duhsaktu zawng zawngte chungah lawmthu ka sawi bawk," tiin an ram medical team-te a fak.

Coronavirus do dan sawi chhunzawmin Marinakis chuan, "Covid-19 dona kawngah hi chuan inthlalhdah a thiang lo a, scientist leh sorkar thupek zawm a ṭul. Ina awm hi a pawimawh ber a ni a, keimahni kan him chuan kan khawtlang a him," tiin a sawi.



Share this Post

Login to comment
No Comments