Ramhlun North hmaah Police thinrim

Mizoram Police-in inkhel thunun chungin Aizawl FC lakah an tlawm a, vawiin tlai dar 4:00 hian Ramhlun North nen Lammualah an inhmachhawn dawn.

Lalbiaksanga Colney hoin Mizoram Police hi MFA Super Cup-ah an champion a, amaherawhchu I Day Football-ah Aizawl FC lakah an mualpho. Police hi I League club lakah an chak loh nawn avangin MPL round 3 khelh zawhah vanduai thei an ni tih a lang nghal.

Chutihrualin Police chak loh zawh chiah hmachhawn hi a châkawm lo a, Ramhlun North hmabak a huphurhawm.

BSa Colney hian tlar hmaah Malsawmfela a awltir ṭhin chungin F. Lalrinpuia, Lalbiakhlua, Lalfakzuala leh Lalsangbera te a nei a, heng player ṭha chawm turin R. Malsawmtluanga a awm bawk avangin vawiin tlai hian chak tura rinkai an ni.

Ramhlun North erawh Police angin hming langsar an kawl lo a, amaherawhchu pressure an neih loh avangin an tawh a khirh ang.

Jonathan C. Lalrintluanga (Thantea) hote tan vanneihna nei turin keeper Eddie Zorammawia leh tlarhnung an khelh ṭhat a ṭul a, point thum hlawh chhuak tur chuan captain Jessy Vanlalmuana'n a goal khung boot a bun a ṭul ang.



Share this Post

Login to comment
No Comments