Mizoram Premier League Season 8-ah Chawnpui FC-in nimin tlai khan FC Venghnuai an chelh a, 1-1 in an inhnehtawk. Coach tawnhriat nei ṭha HC Zarzoliana hoten point an hlawh chhuah takah chuan MPL club pariatten point an nei ta vek.

Lammuala inkhelah hian goal ṭha tak pahnih a lut - FC Venghnuaiin Vanlalthanga goal hmangin hma an hruai a, Chawnpui FC-in Moody Lalawmpuia hmangin second half-ah an sut. Man of the match-ah Chawnpui keeper Vannunmawia thlan a ni.

Goal nawrtute

Chawnpui FC-in Rangdajied striker hlui Lalnunpuia Tlau (Bawihpuia) an ziak lut fel thei a, Khawzawl tlangval hian bul ṭan nghalin inhliam Vanlalthlamuana aiah a rawn lut.

FC Venghnuai lamah MPL-a tawnhriat nei ṭha PC Zosangliana leh Lalmuanzova ten bul an ṭan ve bawk.

A hmuhnawm

Football-a hmuhnawm ber chu goal a ni a, Venghnuai leh Chawnpui inkhelah hian goal hmuh tur a awm bakah goal chance a tam hle. Tun season-a bul ṭan ṭha zawk Venghnuaiin Vanlalthanga hmangin an khung hmasa zawk. 

Hualngohmun tlangval Thanga hian minute 24-naah ding lam kil aṭangin a ke vei lamin a hlai lut. Venghnuai goal khung belh tur erawh keeper Vannunmawia'n a dansak a, Chawnpui keeper hian PC Zosanga goal khung tur pawh a dang ṭha hle.

Chawnpui striker thar Bawihpuia'n goal khungna hun ṭha bawhpelhin hnai tak 

aṭangin keeper RS Lallawmzuala zawnah chiah a tauh. Ramhlun South tlangval Lalnunmawia pawhin free kick aṭangin goal bar a tihper.

Second half-ah Venghnuaiin ball chang tam mah se Chawnpuiin goal an khung zawk. Minute 68-naah Chawnpui tan Moody Lalawmpuia'n mawi zetin box pawn aṭangin a pet goal a, keeper Lawma tan dah theih a ni lo. Hun tawp lamah Venghnuaiin an nawr na a, keeper Vannunmawia'n Chawnpui point a hlawhchhuah pui.

Zara nge nge

Chawnpui FC coach HC Zarzoliana chuan, "Point kan hlawh chhuah avanga a nawmna a awm hran lo. Goal chance kan hlah avangin kan vanduai a, Thlamuana inhliam vangin kan goal nawr a nat loh phah," tiin inkhelh banah a sawi.

MPL hmasa bera Dinthar FC champion puitu Zara hi team chhe zawkah a indah lo a, point khatah a lawm lo. Chawnpuiin point an hlawh chhuah takah chuan MPL a ngaihnawm sawt a, semifinal leh relegate tur thliar thiam a har tulh tulh.

Share this Post