Barcelona chhandam nan Messi & Suarez

Luis Suarez-a'n 'overhead kick' hmangin goal mawi bik a khung a, Lionel Messi chuan freekick class tak a chhuih lut bawk. 

Pathianni zan khan Barcelona hian 4-0 in Sevilla an sawp a, table chung ber luahtu Real Madrid an um chhunzawm zel. 

Barca tan hian Suarez leh Messi bakah Arturo Vidal leh Ousmane Dembele chuan goal khat ve ve an khung a, Dembele hi Ronald Araujo nen hnawhchhuah an ni bawk. 

Hetihlai hian Atletico Madrid erawh an chak zo lo a, an mikhualna ramah Real Valladolid chu goal khung loin an inhnehtawkpui. 

Suarez goal a mawi

Kum 32 mi ni tawh mah se 'class' erawh a la ngai reng tih Luis Suarez-a'n a pholang a, minute 27-na lekah boruaka invawrh kang chungin goal hmahruai a khung. 

Suarez hian sawiselna tawk ve ṭhin bawk mah se goal hmangin sawiseltute a chhanglet ṭhin a, tun season-ah match riat khelin goal ruk a khung tling ta der. 

Barcelona a pan hnuah match 255 khelin goal 183 a khungsak a, 2014-a Catalan club a pan hnuah season khata goal 25 khung tlin loh a la nei lo. 

Uruguayan striker hian tun season-ah pawh goal 20 aia tam khung a beisei dawn a, Barca-in champion nomawi an chawi nan chu chu a ṭangkai ang. 

Goal hnih dang

Real Madrid coach hlui Julen Lopetegui enkawlna hnuaiah Sevilla hian season an hmang ṭha a, goal chhuah hmasa mah se fan-ten beiseina an la nei. 

Mahse, Suarez-a goal khung aṭanga minute ngana lekah Barca-in goal an zawng hmu lehnghal a, Arturo Vidal chuan chak ngei an tum tih lantir nan goal hnihna a rawn khung. 

Hliam vanga talbuai ngun tak Dembele-a'n dam ṭhat ver vawr lai tala goal khung loh a duh bik lo a, minute 35-naah goal thumna a rawn khung. 

French forward hi hun tawp nan minute hnih chiah a awm tawh tihah hnawhchhuah a ni a, player ropui ni turin thinrim laia insum dan zir a la mamawh. 

Aw Messi!

Lionel Messi ropuizia sawi turin thuin a daih lo. Hliam vanga a lo kir hnuah player naran tih theih lohin freekick 'cial zet a rawn khung leh a, Messi zawng 'Messi' a lo la ni reng. 

Messi hi hliam vanga season bul a ṭan theih loh reng hnuin Villarreal lakah a vawi khat nan league inkhel bul a ṭan a, mahse hliam vangin lakchhuah a ni. 

Champions League-a Inter Milan an hmachhawn ṭumin a rawn kir a, Argentine striker hian Suarez-a goal khung tur chu player thiam bik lo tana tih theih loh tur aṭangin a assist. 

Sevilla lakah goal a rawn khung leh ta a, Messi inkhel lai hmuh theih hi malsawmna a ni - kum 32 ni tawh mah se a thiamna erawh an la uai thla ve lo. 

Red card leh Barca

Kum 20 mi Ronald Araujo chu minute 73-naah tlan luhtir a ni a, Barcelona tana professional match-a inkhel bul a ṭan hmasak ber a ni. 

Mahse, Araujo tan zan chhinchhiah tlak a ni lo. Uruguayan defender hi Javier Hernandez tla fal tur lakah a foul a, Chicharito hmachhawntu hi amah chauh a nih tawh avangin referee-in red card a pe. 

Referee red card phawrh vanga buaina kal zelah Dembele a ṭawng duham hret a, red card pein hnawhchhuah ve a ni bawk. 

Barca vanneihna erawh player pahnihin red card an hmuh hian minute 87 leh 89-na a ni tawh a, an tuar hman lo. 



Share this Post

Login to comment
No Comments