US an chungnung ber, India-in medal la lo

World Athletics Championships 2019 chu Pathianni zan khan a hmawr bawkna neih a ni a, a pumpuiah gold medal 14 latu United States chu pakhatna niin India chuan medal a la ve lo.

Inelna hi September 27 aṭanga October 6 chhung khan Khalifa International Stadium-ah neih a ni. Ram hrang 209 aṭangin infiammi 1972 zet an pungkhawm a, mipa leh hmeichhe tan infiamna peng hrang 24 ve ve a awm.

International Association of Athletics Federations (IAAF) chief Lord Coe chuan, "Infiamna khawmpui lian kan nei fo tawh a, kumin hi a vawi 17-na chiah niin ṭum danga kan hman tawh aiin a hlawhtling zawkah kan ngai," a ti. Qatar-ah entu an tlem a, a tir lamah sawisel hlawh mah se a tawpah erawh fans an ṭha ta hle.

World Championships-ah hian Usain Bolt chuan gold medal 11 zet lain record a lo chelh reng tawh. Kuminah USA sprinter Allyson Felix-i chuan gold medal 13-na hlawh chhuakin Bolt a rawn khum, fa a neih aṭanga thla 11 hnu lekah hetiang record a siam thei hian fak a hlawh hle.

Mizo ten Kumpinu tia kan hriat ṭhin Great Britain pawh an che fuh lo, gold medal pahnih chauh lain medal an lak zawng zawng pawh panga chauh a ni - 2005 hnu lamah chuan World Championships neih tawha an chet chhiat ber ṭum a ni.



Share this Post

Login to comment
No Comments