Manchester City squad man a to ber

CIES Football Observatory-in zirchianna an tihchhuah thar berah Manchester City squad hlutna a sang ber a, Premier League champion player-te man zat belhkhawm hi euro tluklehdingawn 1.01 a tling!

Manchester City hi khawvel football club zinga euro tluklehdingawn man squad nei hmasa ber an ni a, anmahni hnaihtu Paris St-Germain (€913m) leh Real Madrid (€902m) pawhin an la thlau hle. 

Hetihlai hian squad man tlawm ber chu German club Paderborn an ni a, tun season-a Bundesliga kai thar club-a player-te man zat belhkhawm hi euro maktaduai li a tling ve hram!

Switzerland-a hmunpui nei, football statistics research group CIES hian Europe-a league langsar panga Premier League, La Liga, Serie A leh Bundesliga-a senior player-te man zat an chhut a ni. 

Man tam City

Kum 2008 khan Abu Dhabi United Group chuan Manchester City hi pound maktaduai 210-in an lei a, Europe-a club langsar ber pawl din tumin sum an ren lo. 

Khawvela coach langsar leh player lar ber ber an lei khawm a, tun thlengin transfer bazar-a chet 'nat' hi an la ṭhulh lo. Tun nipui transfer-ah pawh khan player lakluh nan euro maktaduai 168 an seng tling. 

Nipui transfer-a an sum sen hian football chanchina euro tluklehdingawn khat man hu squad din hmasa berah a siam ta zui a, Real Madrid leh Paris Saint-Germain te meuh pawhin an chung en. 

Mahse, City hian Premier League nomawi pali ngawt an chawi tawh chungin an duh ber Champions League nomawi erawh an la lei chhuak thei lo. 

Club dang

Premier League-a Manchester City elpui zingah Manchester United squad chu manto pahnihna an ni a, tuna an squad neih din nan hian euro maktaduai 751  an seng. 

European champion Liverpool squad neih mek hlut zawng chu euro maktaduai 639-a tling a, City leh United dawta Premier League club-a squad nei manto an ni. 

United hi a pumpuiah palina an ni a, Liverpool erawh pasarihna an ni thung Premier League club zingah Chelsea (€561m) leh Arsenal (€498m) chu top 10-a lang dang an ni bawk. 

Barcelona (€697m) chu sum seng hnem viau angin lang ṭhin mah se Juventus (€719m) pawh an phak lo a, Chelsea (€561m) leh Arsenal (€498m) inkarah Atletico Madrid (€550m) an awm. 

Inthlauhna a sang

La Liga-a squad manto ber Real Madrid leh hniam ber Real Mallorca inthlauhna chu a let 148 a tling a, PSG squad chu Nimes squad aiin a let 114-in a hlu zawk!

Juventus-in Serie A-a squad hlutna nei hniam ber Lecce chu a let 63-in an khum a, Paderborn squad aia Bayern Munich squad hlutna chu a let 85-a tling thung. 

English football-ah sum a tam miau avangin club inthlauhna a tam lo ber a, Premier League-a squad hlutna hniam ber Norwich City aia Manchester City sanna chu a let 32 chauh a ni. 

Premier League club pariat chu top 8-ah an lang phak a, German champion Bayern Munich (€352m) aiin Everton player-te (€486m) man belhkhawm a tam zawk!



Share this Post

Login to comment
No Comments