Assam-ah tuilian vangin mi pathum thi

Assam state-ah ruahsur nasa avanga tuilian leh leiminah darkar 24 chhungin mi pathum an thi a, harsatna thleng hian mi nuai hnih chuang a nghawng tih official-te chuan an sawi. 

Revenue and Disaster Mana­gement Department chuan tuilian tuarte ṭanpuina turin State Disaster Response Fund (SDRF) aṭangin cheng vaibelchhe 21.03 a pe chhuak nghal a, Gratuity Relief (GR) atan cheng vaibelchhe 4.50 pek a ni dawn bawk. 

Hetih lai hian tuilian hian ziaawm lam a la pan mai dawn lo nia sawi a ni a, khawchin zirtute chuan Assam, Arunachal Pradesh, Manipur, Mizoram leh Nagaland-ahte ruah a la sur chhunzawm dawn tih an sawi. 

Assam State Disaster Management Authority (ASDM) chuan Dhemaji, Lakhimpur, Biswanath, Darrang, Barpeta, Nalbari Chirang, Majuli, Golaghat, Jorhat leh Dibrugarh district-a thingtlang khaw 530-a mi nuai hnih velin tuilian hi an tuar tih an sawi. Dhemaji leh Lakhimpur district chu a tuar nasa ber an nih thu an sawi bawk. 

State Disaster Response Force (SDRF) leh National Disaster Response Force (NDRF) chuan tuilian tuarte chhanchhuah leh chhawmdawl hna hi an thawk nghal a ni. 

Ruahsur nasa vangin Bhra­maputra, Dikhoaw, Dhansiri, Jia Bharali, Puthimari leh Beki luite chu an lian a, hlauhawm chhinchhiahna an pel vek a ni. Brahmaputra lui lian hian Kaziranga National Park hmun ṭhenkhat pawh a chim tawh a, ramsa ṭhenkhat chuan himna zawngin hmun sang lam an pan a ni. Mahse park chhung dinhmun uluk taka enfiah reng a nih thu Kaziranga Divisional Forest Officer Rohini Ballav Saikia chuan a sawi a, park kaltlang NH-27-a motor tlan chak theih zawng pawh bithliah a ni dawn tih a sawi. 

Official-te chuan tuilian hian thlai chinna ram hectare 13,276 a chim tawh tih an sawi. Guwahati leh North Guwahati inkara lawng service pawh Brahmaputra lui lian vangin nimin aṭang khan tihtawp lailawk a ni. 



Share this Post

Login to comment
No Comments