Manipur : Loneituten sorkar lakah Lungawi lohna an lantir

Manipur sorkar laka lungawi lohna lantirin kar kal ta Inrinni khan loneitute chuan Manipur Secretariat luhkhung an tum a, mahse police-ten an lo dang a ni. 

Manipur state-ah hian ruahtui a tlak ṭhat loh avangin loneituten har­satna an tawk mek a, an thlai chin mamawh ang tui an pek theih loh vangin an buai mek a ni. Tui lama harsatna an tawh mek chinfel dan ngaihtuah pui tawk loah sorkar puhin lungawi lohna an lantir a ni. 

Kumin June thla chhung khan Manipur leh hmarchhak state dang chuan kum danga ruahtui an dawn ṭhin aia 41% -a tlem an dawng a, hei hian loneitute a ti mangang ṭan tawh hle a ni. 

State sorkar chuan local elected member-te kaltlangin loneitute hnenah water pump set a sem ṭan tawh a, mahse loneitu tam zawk chuan sorkar puihna hi an la dawng lo. 

Loneitute hian Irabot Foundation hmingin lungawi lohna hi an lantir a, an harsatna chinfel sak thuai tura sorkar phutin Imphal-a Old Secretariat block luhkhung an tum. Police-ten pungkhawmte hi an lo dang a, hemi hnu hian loneitute hian Chief Minister Secretariat-ah luh an tum leh a, hei pawh police-ten an lo dang leh a ni. 

Irabot Foundation gene­ral secretary Thongam Ajit chuan sorkar chu tui mamawh ang an neih loh avanga loneitute harsatna tawh mek chinfel dawn kawng zawnsak aiin, thuneihna inchuhin an buai zawk tih a sawi. Tui pump tur hian tui hnarte a kang vek avangin sorkarin water-pump a sem pawh chu hmanna a awm chuang lo tih sawiin; sorkar chu state tan long term water policy siam turin an phut tih a sawi bawk. 



Share this Post

Login to comment
No Comments